މަތީ ތަޢުލީމު ހާސިލްކުރަމުންދާ 32 ދަރިވަރަކަށް ޗައިނާ އެމްބަސީން އެހީ ފޯރުކޮށްދީފި

މަތީ ތަޢުލީމު ޙާސިލްކުރަމުންދާ 32 ދަރިވަރަކަށް ރާއްޖޭގައި ހުންނަ ޗައިނާ އެމްބަސީން އެހީތެރިކަން ފޯރުކޯށްދީފިއެވެ.

"ޗައިނީސް އެންބެސެޑަރ ބަރސަރީ" ޕްރޮގުރާމުގެ ދަށުން ޤައުމީ ޔުނިވަރސިޓީއާއި އިސްލާމީ ޔުނިވަރސިޓީގައި ތަޢުލީމު ހާސިލުކުރަމުންގެންދާ 32 ދަރިވަރަކަށް މިފަހަރުވަނީ ވަނީ އެހީދެއްވާފައެވެ. އެހީގެ ގޮތުގައި ކޮންމެ ދަރިވަރަކަށް ޖުމްލަ 10،000ރ. ވަނީ ދީފަ އެވެ.

އެހީ ހަވާލު ކުރަން ބޭއްވި ރަސްމިއްޔާތުގައި ޗައިނާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލީޝިން އާއި ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު އެމްއެންޔޫގެ ވައިސް ޗާންސެލަރ ޑރ.ޢާއިޝަތު އާދަމް، އައިޔޫއެމްގެ ޑެޕިއުޓީ ވައިސް ޗާންސެލަރ އާއިޝަތު ވަޙީދާ، އަދި މި ދެ ޔުނިވަރސިޓީގެ މުވައްޒަފުންނާއި ދަރިވަރުން ބައިވެރިވިއެވެ.

މިފަދަ ޕްރޮގްރާމްތަކުގެ ސަބަބުން ޗައިނާއާއި ދިވެހިރާއްޖޭގެ ގުޅުން އިތުރަށް ބަދަހިވެ، ގައުމު ބިނާކުރާނެ ޒުވާން ޖީލެއް އުފެދިގެންދާނެކަމަށް ސްޓޭޓް މިނިސްޓަރު އަހުމަދު ޝަފީއު ވިދާޅުވިއެވެ.

ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ވަން ލީޝިން ވިދާޅުވީ ޤައުމުގެ އުއްމީދަކީ ޒުވާނުންކަމަށާއި، ޤައުމުގެ މުސްތަޤުބަލު އޮތީ ޒުވާނުންގެ އަތްމަތީގައި ކަމަށެވެ.

މިއަހަރުގެ ކުރީކޮޅު، ރައީސް ޑރ.މުޢިއްޒު ކާމިޔާބު ދައުލަތުގެ ދަތުރެއް ޗައިނާއަށް ކުރެއްވިކަމަށާއި، މިއީ ޗައިނާ-ދިވެހިރާއްޖެ ގުޅުން އައު މަރުޙަލާއަކަށް ގެންދިޔަ ދަތުރެއްކަން ސަފީރު ފާހަގަކުރެއްވިއެވެ.

ޗައިނާއިން އަބަދުވެސް ރާއްޖޭގެ އިންސާނީ ވަސީލަތްތައް ތަރައްޤީކުރުމަށާއި އަމިއްލަ ފުދުންތެރިކަމާއެކު ތަރައްޤީވުމަށް މަގުފަހިކުރުމަށްޓަކައި ޗައިނާއިން ރާއްޖޭގެ ތަޢުލީމީ މަސައްކަތްތަކަށް އެހީތެރިކަން ދެމުން ގެންދެއެވެ.

މިދިޔަ އަހަރު ވެސް އެމްއެންޔޫގެ 10 ދަރިވަރަކަށް މި އެހީ ފޯރުކޮށްދީފައިވެ އެވެ.