ޖަޕާނުން ދޭ ސްކޮލަޝިޕްތަކަކަށް ކުރިމަތިލުމަށް ފުރުސަތު ހުޅުވާލައިފި

ޖަޕަނީޒް ގްރާންޓް އެއިޑް (ޖޭޑީއެސް)ގެ ފަރާތުން ވަނީ ދިވެހިރާއްޖެއަށް ހުޅުވާލި ސްކޮލަޝިޕް ފުރުސަތަށް ކުރިމަތިލުމަށް ހުޅުވާލައިފިއެވެ.

ހަޔަރ އެޑިއުކޭޝަނުން ކުރި އިއުލާނެއްގައިވާގޮތުން ޖޭޑީއެސްގެ ފަރާތުން ވަނީ ދިވެހިރާއްޖެއަށް މާސްޓަރސް ޑިގްރީގެހަ ސްކޮލަރޝިޕް ފުރުސަތު ހުޅުވާލާފައެވެ.

އެ މިނިސްޓްރީން ބުނީ މިސްކޮލަޝިޕްތަކަށް ކެންޑިޑޭޓުން ހޮވުމުގެ ހުރިހާ މަސައްކަތެއްވެސް ކުރާނީ ސްކޮލަޝިޕްދޭ ފަރާތުންކަމަށެވެ. އަދި މިސްކޮލަޝިޕަށް ހޮވޭ ކެންޑިޑޭޓުންގެ ކޯހުގެ ހުރިހާ ހަރަދެއް އެ ފަރާތުން ހަމަޖައްސާނެކަންވެސް ފާހަގަކޮށްފައިވެއެވެ.

މިސްކޮލަޝިޕްގެ ކޯސްތަކާއިބެހޭ އިތުރު މައުލޫމާތާއި، އެޕްލިކޭޝަން ހުށަހަޅަންވީގޮތުގެ މައުލޫމާތު އެ މިނިސްޓްރީގެ ވެބްސައިޓުންނާއި، އެކަމަށް ހާއްސަކޮށްފައިވާ ލިންކުން ލިބޭނެކަމަށްވެސް އިއުލާނުގައި ބުނެފައިވެއެވެ.

އިއުލާނުގައިވާގޮތުން މިފުރުސަތުތަކަށް އޮންލައިން އެޕްލިކޭޝަން ހުށަހެޅުމުގެ ސުންގަޑިއަކީ އަންނަ މަހުގެ 24 ވަނަ ދުވަހުގެ ހަވީރު 4:00 އެވެ.

މިޕްރޮގްރާމްތަކަށް ހޮވޭ ފަރާތްތަކުން، ޕްރޮގްރާމް ފުރިހަމަކުރަން ފެށުމުގެ ކުރިން އެ ޕްރޮގްރާމެއް ހިންގާ ޔުނިވަރސިޓީ ނުވަތަ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ މަރުކަޒެއްކަމާއި، ހޮވިފައިވާ ޕްރޮގްރާމަކީ އެމްކިޔުއޭ އިން ގަބޫލުކުރާ ޕްރޮގްރާމެއްކަން ކަށަވަރު ކުރުމަށް ހަޔަރ އެޑިއުކޭޝަން މިނިސްޓްރީން އެދިފައިވެއެވެ.

މީގެއިތުރުން ޕްރޮފެޝަނަލް ނުވަތަ ލައިސެންސިންގ ދާއިރާތަކުގެ ޕްރޮގްރާމް ހެދުމަށް ހޮވޭ ފަރާތްތަކުން، އެ ޕްރޮގްރާމެއް ފުރިހަމަކުރަން ފެށުމުގެ ކުރިން، ކަމާބެހޭ އިދާރާއަކުން ގަބޫލުކުރާ މަރުކަޒެއްގައި ހިންގާ، އެ އިދާރާއަކުން ގަބޫލުކުރާ ޕްރޮގްރާމެއްކަން ކަށަވަރުކުރުމަށްވެސް އެދިފައިވެއެވެ.