ސެޓަލައިޓް މެދުވެރިކޮށް ކަނޑުގެ ސަރަހައްދުތައް ބަލަހައްޓަން ދަނީ ތައްޔާރުވަމުން: ޣައްސާން

ސެޓަލައިޓް މެދުވެރިކޮށް ރާއްޖޭގެ ކަނޑުގެ ސަރަހައްދުތައް ބެލެހެއްޓުމަށް ވާންޖެހޭ ތައްޔާރީތައް ވަމުން ދާކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ވަޒީރު މިފަދައިން ވިދާޅުވެފައިވަނީ، ދައުލަތުގެ މީޑިއާ ޕީއެސްއެމްގެ "ދިވެހީންގެ އަޑު ދުނިޔެއަށް" ޕްރޮގްރާމުގައި ވާހަކަފުޅުދައްކަވަމުންނެވެ.

ރާއްޖޭގެ ސަލާމަތީ ކަންކަން ބެލެހެއްޓުމަށް ކުރެވެމުންދާ މަސައްކަތްތަކާއި ބެހޭގޮތުން މައުލޫމާތުދެއްވަމުން، ވަޒީރު ވިދާޅުވީ މި ރާއްޖޭގެ ކަނޑުގެ ސަރަހައްދުތައް ބެލެހެއްޓުމަށް މޯލްޑިވްސް ސްޕޭސް ރިސާޗް އޯގަނައިޒޭޝަންއާއި ގުޅިގެން މަސައްކަތްތަކެއް ކުރެވެމުންދާކަމަށެވެ. މޯލްޑިވްސް ސްޕޭސް ރިސާޗް އޯގަނައިޒޭޝަނަކީ އަމިއްލަ ޒުވާނުންތަކެއް އުފައްދާފައިވާ އޯގަނައިޒޭޝަނެކެވެ. އަދި އެ ޒުވާނުންނަކީ އެމެރިކާގެ ޖައްވީ އިދާރާއާއި މުއާމަލާތްކުރާ ޒުވާނުންތަކެއްކަމަށް ވަޒީރު މައުލޫމާތުދެއްވާފައިވެއެވެ.

އެއާއެކު، ޖައްވަށް ފޮނުވާ ސެޓެލައިޓުގެ އެހީގައި ރާއްޖޭގެ ކަނޑުގެ ސަރަހައްދުތައް މިހާރަށްވުރެ ހަރުދަނާގޮތެއްގައި ބެލެހެއްޓޭނެކަމަށާއި، ދާދި އަވަހަށް ސެޓަލައިޓުތައް ބޭނުންކުރަން ފަށާނެކަން ވަޒީރު ޣައްސާން ފާހަގަކުރެއްވިއެވެ.

އެގޮތުން، މި މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ތެރެއިން ކުރެވެމުންދާ މަސައްކަތްތަކެއްކަމަށާއި، އެމަނިކުފާނުގެ އަމާޒަކީ ރާއްޖޭގެ ކަންޑުގެ ސަރަހައްދުގައި ބައިނަލްއަގްވާމީ ގޮތުން، ހިންގަމުންދާ ޖަރީމާތަށް ހުއްޓުމަކަށް ގެނެސް، ރާއްޖޭގެ ކަނޑުގެ ސަރަހައްދުތަކަކީވެސް ސުލްހަވެރިކަމާއެކު، ދަތުރުކުރެވޭނެ ތަނަކަށް ހެދުންކަމަށް ވަޒީރު ވިދާޅުވިއެވެ.

ދިފާޢީ ވުޒާރާއިން ވަނީ ރާއްޖޭގެ ކަނޑުގެ ސަރަހައްދު ބެލެހެއްޓުމަށް ޑްރޯންތަކެއްވެސް މިއަހަރު ތެރޭގައި ގެނެސްފައެވެ.