ކުޑަކުދިންގެ މެދުގައި ނޭވާލާ ނިޒާމަށް ޖެހޭ ބައްޔެއް ފެތުރެނީ

ނޭވާލާ ނިޒާމަށް ޖެހޭ ބައްޔެއް ކުޑަކުދިންގެ މެދުގައި އާންމުވާން ފަށާފައިވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން މިއަދު އެކްސްގައި ކުރި ޕޯސްޓެއްގައި ބުނެފައި ވަނީ ކުޑަކުދިންގެ ތެރޭގައި ރެސްޕިރޭޓަރީ ސިންސިޓިއަލް ވައިރަސް (އާރުއެސްވީ) ކޭސްތައް ކޮންމެވެސް ވަރަކަށް އިތުރުވެފައި ވާކަމަށް އެ އިދާރާގެ އެންމެ ފަހުގެ ތަފާސްހިސާބުތަކުން ދައްކާ ކަމަށެވެ.

އެހެންކަމުން، މިފަދަ އަލާމާތްތައް ފެންނަ ނަމަށް ވީ އެންމެ އަވަހަކަށް ޑޮކްޓަރަށް ދައްކައި މި ބަލިން ފަސޭހަ ވުމަށް އަޅަންޖެހޭ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސް ކޮށްފައެވެ.

އަދި މި ބަލި ގާތުން ބަލަމުންދާ ކަމަށާއި، ކުޑަކުދިން މިފަދަ ނޭވާލާ ނިޒާމަށް ޖެހޭ ބަލިތަކުން ރައްކާތެރިކުރުމަށް ވެސް އެ އިދާރާއިން އިލްތިމާސްކޮށްފައިވެއެވެ. އެގޮތުން، މި ބަލިން ރައްކާތެރިވުމަށް ކުރެވިދާނެ ކަންތައްތަކުގެ ތެރޭގައި އަތްދޮވުމާއި، ތޮއްޖެހިފައިވާ ތަންތަނުން ދުރުހެލިވުން ހިމެނޭކަމަށް އެ އިދާރާއިން މައުލޫމާތު ދީފައިވެއެވެ.