ތިންވަނަ ދައުރުގެ ޖަލްސާތަށް ފަށާނީ އޮކްޓޯބަރު ހަތެއް ގައި

ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ ޖަލްސާތައް އަންނަ އޮކްޓޯބަރު މަހުގެ 7 ވަނަ ދުވަހު ފެށުމަށް ނިންމައިފިއެވެ.

މިދިޔަ އޮގަސްޓް މަހު މަޖިލީހުގެ މި އަހަރުގެ ދެވަނަ ދައުރު ނިންމާލުމަށް ފަހު މަޖިލިސް ޗުއްޓީއަށް ގޮސްފައިވަނީ ދައުރު ދަންމާލުމަށްފަހުއެވެ. އެއަށް ފަހު ދައުރުން ބޭރު ތިން ޖަލްސާއެއް ވަނީ ބާއްވާފައެވެ.

މަޖިލީހުގެ އަގުލަބިއްޔަތު އޮންނަ ވެރިކަން ކުރާ ޕީއެންސީން ދައުރުން ބޭރު ޖަލްސާ ބާއްވަން ހުށަހެޅީ ކުންފުނިތަކުގެ ގާނޫނަށް ބައެއް އިސްލާހު ގެނައުމުގެ ބިލުގެ މަސައްކަތް ނިންމާލުމަށާއި، ހުސްވެފައިވާ ޕްރޮސިކިއުޓާ ޖެނެރަލްގެ މަގާމަށް އައްޔަން ކުރަން ނަން ފޮނުވާފައިވާ ބޭފުޅަކަށް ރުހުން ދިނުމަށެވެ.

މިއަދު ދައުރުން ބޭރުން ބޭއްވި ތިން ވަނަ ޖަލްސާ ނިންމަވާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ދައުރުން ބޭރުގައި ޖަލްސާ ބާއްވައިގެން ކުރިއަށް ގެންދިއުމަށް 50 މެންބަރުން ސޮއިކުރައްވައި ހުށަހެޅި ހުރިހާ މަސައްކަތެއް މިއަދު ނިންމާފައިވާ ކަމަށެވެ.

އަބްދުއްރަހީމް ވިދާޅުވީ، ތިން ވަނަ ދައުރުގެ ފުރަތަމަ ޖަލްސާ ބޭއްވުމަށް އެ މަނިކުފާނު ނިންމަވާފައިވަނީ އަންނަ މަހުގެ ހަތް ވަނަ ދުވަހު ކަމަށެވެ.

މަޖިލިސް ޗުއްޓީއަށް ގޮސްފައިވަނީ ޖުމްލަ މަސައްކަތުގެ 82.9 އިންސައްތަ ހާސިލްކުރުމަށް ފަހުއެވެ.