އިމިގްރޭޝަން އޮފިސަރުންތަކަކަށް ހެދިގެން ފޭރުނު މައްސަލައިގައި އެކަކު ހައްޔަރުކޮށްފި

އިމިގްރޭޝަން އޮފިސަރުންތަކަކަށް ހެދިގެން ފޭރުނު މައްސަލައިގައި އެކަކު ހައްޔަރުކޮށް މައްސަލަ އިތުރަށް ތަހުގީގުކުރަމުންދާކަމަށް ފުލުހުން ބުނެފިއެވެ.

މި މައްސަލައާއި ގުޅިގެން ހައްޔަރުކޮށްފައިވަނީ ގ. ބެރުގެ، އުމުރުން 44 ގެ މުޙައްމަދު ނަވީން އެވެ.

އިމިގްރޭޝަންގެ އޮފިސަރުންތަކެއް ކަމަށް ހެދިގެން ދިވެހި ދެ ފިރިހެނުން ގެއަކަށް ވަދެ ބިދޭސީންތަކެއްގެ އަތުން 9000 ރުފިޔާ ފޭރިގެންފިއެވެ.

މިމައްސަލަ ފެންމަތިވުމާއި ގުޅިގެން އިމިގްރޭޝަން ކޮންޓްރޯލަރ ޝަމްއާން އެކްސްއަށް ކުރެއްވި ޕޯސްޓެއްގައި ވިދާޅުވީ އިމިގްރޭޝަންގެ ރެއިޑްތަކުގައި އޮފިސަރުންގެ އައިޑީ ފެންނަ ގޮތަށް ހުންނާނެ ކަމަށާއި މިހާރުގެ އޮޕަރޭޝަންތަކަކީ ޔުނިފޯމް ލައިގެން ކުރިއަށް ގެންދާ އޮޕަރޭޝަންތަކެއް ކަމަށެވެ.

މި މައްސަލައާ ގުޅިގެން ފުލުހުން މީޑިއާއަށް ކުރެއްވި މެސުޖެއްގައި ވިދާޅުވެފައިވަނީ، އިއްޔެގެ ވަގުތެއްގައި ދިވެއްސަކު އިމިގްރޭޝަން އޮފިސަރެކޭ ބުނެ އޮޅުވާލައިގެން ގެއަކަށްވަދެ ބަންގްލަދޭޝަށް ނިސްބަތްވާ މީހެއްގެ އަތުން 9،000 ރުފިޔާއާއި ފޯނެއް ފޭރިފައިވާ ކަމަށާއި އެ މައްސަަލަ އިއްޔެ ފުލުހުންނަށް ހުށަހަޅައިފައިވާ ކަމަށެވެ.

އިމިގްރޭޝަންގެ އޮފިސަރުންތަކެއް ކަމަށް ހެދިގެން ގޮސް ބިދޭސީންތަކެއްގެ އަތުން ފޭރޭ މި މައްސަލަ ފެންމަތިވެފައި މިވަނީ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ހާއްސަ އޮޕަރޭޝަނެއް ފަށާފައިވަނިކޮށެވެ.

މިމަސައްކަތުގެ މަޤްސަދަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދައި، އާންމު ސިއްޙަތަށް ނުރައްކާވާފަދަ ކަންކަން މަދުކޮށް ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދީ، ގަވާއިދާ ޚިލާފަށް އުޅޭ ބިދޭސީންނާއި އެފަދަ ކަންކަމުގައި ޝާމިލްވާ ފަރާތްތަކަށް އިމިގްރޭޝަން ޤާނޫނުގެ ދަށުން ފިޔަވަޅު އެޅުން ކަމަށް އިމިގްރޭޝަނުން ވިދާޅުވެއެވެ.