މިއަދުގެ ދެވަނަ އެކްސިޑެންޓު: ދެ މީހަކަށް ފަރުވާ ދެނީ

ހުޅުމާލެ ހައިވޭ ކައިރިން ދެ ސައިކަލު ޖެހި ހިނގި އެކްސިޑެންޓެއްގައި ދެ މީހަކަށް އަނިޔާވެ، ފަރުވާ ދޭން ފަށައިފިއެވެ.

ފުލުހުން ބުނީ މިރޭ ހުޅުމާލެ ހައިވޭ ކައިރި އިންނަ ވިލާ ޕެޓްރޯލް ޝެޑު ކައިރިން ދެ ސައިކަލު ޖެހި އެކްސިޑެންޓެއް ހިނގި ކަމުގެ ރިޕޯޓު ލިބިފައިވާ ކަމަށެވެ.

މި އެކްސިޑެންޓުގައި އަނިޔާވެފައިވަނީ އަންހެނަކާއި ފިރިހެނަކަށެވެ. އަދި އެ ދެ މީހުންނަށް ވެސް ހުޅުމާލެ ހޮސްޕިޓަލުގައި ފަރުވާ ދެމުން އަންނަ ކަމަށް ފުލުހުން މައުލޫމާތު ދެއެވެ.

ނަމަވެސް އެ މީހުންނަށް ލިބުނު އަނިޔާ ތަކުގެ ތަފްސީލެއް ހިއްސާކޮށްފައެއް ނުވެއެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.

މީގެ ދެ ދުވަސް ކުރިން ވެސް ހުޅުމާލޭގައި ނުރައްކާތެރި އެކްސިޑެންޓެއް ހިނގާފައި ވާއިރު، މިއަދު ހެނދުނު ވެސް ވަނީ އެކްސިޑެންޓެއް ހިނގާފައެވެ. މިއަދު ހެނދުނު 6:50 މި އެކްސިޑެންޓު ހިނގާފައިވަނީ ހުޅުމާލެ 2 ވަނަ ފިޔަވަހީގައި ސައިކަލަކާއި ކާރެއް ޖެހިގެންނެވެ.

މިއެކްސިޑެންޓުގައި ސައިކަލުދުއްވަން އިން މީހާއަށް ސީރިޔަސް އަނިޔާތަކެއް ވެފައިވާ ކަމަށާއި އޭނާ އަށް ހުޅުމާލެ ހޮސްޕިޓަލުގައި އަންނަނީ ފަރުވާ ދެމުންނެވެ.

މަގުތަކުގައި އެކްސިޑެންޓްތައް ގިނަވެ އާންމުން ނުރައްކަލަށް ހުށަހެޅެމުންދާތީ ރައީސް ޑރ. މުހައްމަދު މުޢިއްޒު ވަނީ ހަރުކަށި ފިޔަވަޅުތަކެއް އަޅުއްވަން ނިންމަވާފައެވެ.