އިންޑިއާއިން ހިތަދޫ ޕޯޓަށް 300 މެޓްރިކް ޓަނުގެ ކާގޯ

އިންޑިއާއިން އައްޑުއަށް މުދާ ގެންނަ ބޯޓު 300 ވަރަކަށް މެޓްރިކް ޓަނުގެ މުދާ ބަރުކޮށްގެން އަންނަ ބުދަ ދުވަހު އައްޑޫ ސިޓީ ހިތަދޫ ޕޯޓަށް ބަނދަރުކުރެވޭނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.

އެ ކުންފުނީގެ ސީއީއޯ މުހައްމަދު ވަޖީހު ކުރެއްވި ޕޯސްޓެއްގައި ވިދާޅުވީ އައްޑޫ ސިޓީ އަށް ގެންދިއުމަށްޓަކައި އިންޑިއާގެ ޓިޓުކޮރިން އިން 300 ވަރަކަށް މެޓުރިކް ޓަނުގެ ކާގޯ ލޯޑު ކޮށްގެން "އެމްވީ ނިއުމަތު" މިހާރު ދަތުރު ކުރަމުންދާ ކަމަށެވެ.

އަދި ޝެޑިއުލްގައި ވާގޮތުން މި ބޯޓު އަންނަ ބުދަ ދުވަހު ހިތަދޫ ރީޖަނަލް ޕޯޓަށް ބަނދަރު ކުރެވޭނެ ކަމަށް ވެސް އޭނާ ވިދާޅުވިއެވެ. ވަޖީހު ވިދާޅުވި ގޮތުގައި މި ބޯޓުން ގެންނަ މުދަލުގެ ތެރޭގައި ތަރުކާރީ އާއި މޭވާ އަދި ޖެނެރަލް ކާގޯ ގެ ބާވަތްތައް ހިމެނެއެވެ.

މީގެކުރިންވެސް އިންޑިއާއިން މުދާ ބަރުކޮށްގެން އައްޑުއަށް ހަތަރު ވަރަކަށް ފަހަރު ސީދާ ދަތުރުކޮށްފައިވެއެވެ.

ވަޖީހު ވިދާޅުވީ މިއީ އިންޑިއާއިން ދާއިމީ ގޮތެއްގައި އައްޑޫ ސިޓީއަށް ކާގޯ ގެންދިއުމަށް ޓަކައި މި ސަރުކާރުން ކުރި މަސައްކަތް ކާމިޔާބުވެ، މި މަސައްކަތް ފެށުނު ފަހުން އެ އޮޕަރޭޝަނަށް އިތުރު ކުރެވިގެންދިޔަ ބޮޅެއް ކަމަށެވެ.