ދައުރުވަމުންދާ ވީޑިއޯއަކީ ނައްތާލުމަށް ގެންދެވުނު އުޅަނދުތަކެއްގެ ވީޑިއޯ: ޕޮލިސް

މާލޭސިޓީގެ މޭރީބްރައުން ކައިރީގައި އޮންނަ ޓޯޔާޑް ތެރޭގައި ސައިކަލުތަކެއް ޕިކަޕަކުން ބިންމައްޗަށް ވައްޓާލާ މަންޒަރު ފެންނަ ވީޑިއޯގެ ޙަޤީޤަތް މޯލްޑިވްސް ޕޮލިސް ސަރވިސްއިން ހާމަކޮށްފިއެވެ

ސޯޝަލްމީޑިއާގައި ދައުރުވަމުންދާ ވީޑިއޯގައި ފެންނާނީ ޕޮލިހުން ޓޯކޮށްފައިހުރި ސައިކަލުތަކެއް ޓޯވެހިކަލުން ވައްޓާލާ އުކާލާ މަންޒަރެވެ. މި ވީޑިއޯ ސޯޝަލްމީޑިއާގައި ޢާއްމުވުމުން އެތައް ބައެއްގެ ނުރުހުން ވަނީ މިކަމުގައި ފުލުހުންނަށް ރައްދުވެފައެވެ.

ފުލުހުންގެ މީޑިއާ ގްރޫޕުގައި ފުލުހުން ހިއްސާކުރި މެސެޖެއްގައި ބުނެފައިވަނީ ވީޑިއޯގައި ފެންނަނީ ނައްތާލުމަށްޓަކައި ގެންދެވޭ ސައިކަލުތަކެއްގެ މަންޒަރުތަކެއް ކަމަށެވެ. އަދި އެ ވެހިކަލްތަކަކީ ޤަވާއިދުގެތެރެއިން މިމަހުގެ 6 ވަނަ ދުވަހު ނައްތާލުމަށް ހަމަޖެހިފައިވާ ވެހިކަލްތަކެއް ކަމަށާއި މިވެހިކަލްތަކަކީ ހުޅުމާލެއިން ނައްތާލުމަށް ގެނެވުނު ވެހިކަލްތަކެއް ކަމަށްވެސް ފުލުހުން ބުނެފައިވެއެވެ.

ފުލުހުން މިއަދު ހާމަކުރިގޮތުގައި ޖުމްލަ 247 ސައިކަލާއި 4 ފުރޮޅުލީ 29 ވެހިކަލަކާއި 223 ސައިކަލަކާއި 1 އެމްބިއުލާންސް ވަނީ ނައްތާލާފައެވެ.