އަތޮޅުތެރެ އާއި ރާއްޖެއިން ބޭރުގައި ގެދޮރު ހުރި މާރިޔާ، ގޯތި ހޯދަން ކުރި ޓްވީޓުން އާންމުން ރަތަށް

އަތޮޅު ތެރެއާއި ރާއްޖޭން ބޭރުގައި ގެދޮރު ހުރި ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ، މާލެ ސަރަހައްދުން ގޯތި ނުލިބިގެން ޝަކުވާކޮށް ޓްވީޓް ކުރުމުން ގިނަ ބައެއްގެ ފާޑުކިޔުން އޭނާ އަށް އަމާޒު ވެއްޖެއެވެ.

ރަސްމާލެ މަޝްރޫއާ ގުޅޭގޮތުން "އަދަދު ނޫހުން" ލިޔެފައިވާ ޚަބަރެއް ހިއްސާކޮށް މާރިޔާ ވަނީ މާލެ ރައްޔިތުންނަށް ގޯތި ނުލިބުމުގެ ކަންބޮޑުވުން ހިއްސާކޮށްފައެވެ. އޭނާ ބުނިގޮތުގައި އޭނާ ފަދަ މާލޭ މީހުންނަށް ބޯހިޔާވަހިކަމުގެ މަޝްރޫއުތައް ލަސްވެގެން ގޮސް ގެދޮރު ނުލިބުމަކީ އެކަމުގެ ސަބަބުން އެތައް ނޭދެވޭ އަސަރުތަކެއް ކުރާ ކަމެކެވެ.

އަތޮޅު ތެރެއާއި ރާއްޖެއިން ބޭރުގެ އެކި ހިސާބުތަކުގައި ލަގްޒަރީ ގެދޮރު ހުރި މާރިޔާ މިފަދައިން ވާހަކަ ދެއްކުމުން ގިނަ އާންމުން ވަނީ އޭނާއާ މެދު ނުރުހުން ފާޅުކޮށް ސޯޝަލް މީޑިއާގައި ޚިޔާލުފާޅު ކޮށްފައެވެ.

އެގޮތުން، ބައެއް މީހުން ވަނީ މާރިޔާއަކީ ގިނަ އަދަދެއްގެ މުދަލާއި ފައިސާ ވާރުތަވެފައިވާ މީހެއް ކަމަށާއި، މަހު މުސާރައަށް ބަރޯސާވެގެން ދިރިއުޅޭ އާންމު މީހެއްގެ އިހުސާސް އޭނާއަށް ނުކުރެވޭނެ ކަމަށް ބުނެފައެވެ. އަދި މާރިޔާ ފަދަ މަހުޖަނެއްގެ ފަރާތުން މިފަދަ ވާހަކަތައް އަޑު އިވުމަކީ ޖޯކެއްގެ ގޮތުގައި ސިފަކޮށް އާންމުން ވަނީ މި ޒާތުގެ ވާހަކަތައް ނުދެއްކުމަށް ގޮވާލާފައެވެ.

މީގެއިތުރުން، މާރިޔާގެ ކުރީގެ ފިރިމީހާ، އަބްދުއްސައްތާރު (ސަޓޯ) އިސްވެ ހުރެ ރާއްޖޭގެ ތާރީޚުގައި މިހާތަނަށް ހިންގި އެންމެ ބޮޑު އެއް ޚިޔާނާތް ކަމުގައިވާ އެފްޕީއައިޑީ ޚިޔާނާތުން ލިބުނު ނުހައްގު މަންފާގެ ބޭނުން ހިފި ކަމުގެ ތުހުމަތު ވެސް އާންމުން ވަނީ ކޮށްފައެވެ. އެ ޚިޔާނާތުގައި 380 މިލިއަން އެމެރިކާ ޑޮލަރު ދައުލަތުން ވަގަށް ނަގާފައިވެއެވެ. ސަޓޯ އޭރު ކައިވެނިކޮށްގެން އުޅުނީ މާރިޔާ އާއިއެވެ/

މާރިޔާގެ ފިރިހެން ދަރިފުޅު އައްފާން އަބްދުއްސައްތާރުގެ ނަމުގައި އިނގިރޭސިވިލާތުގެ ލަންޑަނުގެ އެންމެ އަގު ބޮޑު އެއް ސަރަހައްދުގައި 1,530،000 ޕައުންޑުގެ ގެއެއް ހުރި އިރު، އާންމުން ވަނީ މާލޭ ގެދޮރުގެ ވާހަކަ ދެއްކުމުގެ ބަދަލުގައި އޭނާ އެ ގެއަށް ދިރިއުޅުން ބަދަލުކުރުން މާ ރަނގަޅު ކަމަށް ބުނެފައެވެ.

މާރިޔާގެ ބޮޑު ގެސްޓްހައުސްއެއް ލ.ގަމުގައި ވެސް ހުރެއެވެ. އެއީ ގަމުން ހަ ގޯތި ނަގައި އެގޯތިތައް އެސަރަހައްދަކަށް ބަދަލުކޮށް 24000 އަކަފޫޓްގައި ހަދާފައިވާ ގެސްޓްހައުސްއެކެވެ.

އެމްޑީޕީން ދައުރު ނިމެން ގާތްވެފައި ވަނިކޮށް ވޯޓު ހޯދުމަށް ކަނޑުންނާއި ފަޅުން ގޯތި ދޫކުރިކަން ފާހަގަކޮށް އާންމުން ބުނީ، އެމްޑީޕީއަށް ފަސް އަހަރުގެ ދައުރެއް ލިބުމުން، ރައްޔިތުންނަށް ޚިދުމަތް ނުކޮށްދީ، މިސަރުކާރަށް ފާޑުކިޔުމުގެ ހައްގެއް މާރިޔާއަށް ނެތް ކަމަށެވެ.