ނައިޖަރުގައި ފެންބޮޑުވުމުގެ ސަބަބުން 270 އަށްވުރެ ގިނަ މީހުން މަރުވެއްޖެ

ނައިޖަރުގައި ފެންބޮޑުވުމުގެ ސަބަބުން 270 އަށްވުރެ ގިނަ މީހުން މަރުވެ، 700،000 އަށްވުރެ ގިނަ މީހުންނަށް އަސަރުކޮށްފިއެވެ.

ނައިޖަރުގައި މެދުނުކެނޑި ވެހެމުންދާ ބޯ ވާރޭގެ ސަބަބުން 273 މީހުން މަރުވެއްޖެކަމަށް އެ ޤައުމުގެ ރަސްމީ ބަޔާނެއްގައި ބުރާސްފަތި ދުވަހު ވަނީ ހާމަކޮށްފައެވެ. މި މަރުތައް ދިމާވެފައިވަނީ ފެންބޮޑުވެގެން ގެނބިގެންނާއި ގެދޮރު ވެއްޓިގެންނެވެ.

ހުޅަނގު އެފްރިކާގެ މި ޤައުމުގެ ސިވިލް ޕްރޮޓެކްޝަން ޑިރެކްޓަރޭޓް ޖެނެރަލްއިން ބުނެފައިވާ ގޮތުގައި މި ފެންބޮޑުވުމުގެ ސަބަބުން 94،783 ގޭބިސީގެ 710،767 މީހުންނަށް އަސަރުކޮށް، 73،582 ގެ ހަލާކުވެފައިވެއެވެ.

މީގެ އިތުރުން، ބޮޑެތި އަދި ކުދި ޖަނަވާރުތައް ގެއްލި، ސްކޫލްތަކާއި، ޞިއްޙީ މަރުކަޒުތަކާއި، ފިހާރަތައް ވެއްޓިފައިވާކަންވެސް އެ ޑިރެކްޓަރޭޓުން ފާހަގަކޮށްފައިވެއެވެ.

އެންމެ ބޮޑަށް އަސަރުކޮށްފައިވަނީ ޤައުމުގެ ދެކުނު ހުޅަނގު ސަރަޙައްދުގެ ތަހޫއާ އަދި މަރާދީ ސަރަޙައްދުތަކަށެވެ. މި ދެ ސަރަޙައްދުގައި ގިނަ އަދަދެއްގެ މަރު ރިޕޯޓުކޮށްފައިވެއެވެ. އެއީ ތަހޫއާގައި 87 މަރު އަދި މަރާދީގައި 86 މަރެވެ.

އެ ޤައުމުގެ 266 ކޮމިއުނިޓީގެ ތެރެއިން 201 ކޮމިއުނިޓީއަށް ފެންބޮޑުވުމުގެ އަސަރުކޮށްފައިވެއެވެ.