އެމެރިކާގެ ޖޯޖިއާގެ ސްކޫލެއްގައި ދިން ބަޑީގެ ހަމަލާގައި ޝައްކުކުރެވޭ ކުއްޖާގެ ބައްޕަ ހައްޔަރުކޮށްފި

އެމެރިކާގެ ޖޯޖިއާ ސްޓޭޓްގެ ހައި ސްކޫލެއްގައި ހިނގި ބަޑިޖެހުމުގެ ހާދިސާއާ ގުޅިގެން 14 އަހަރުގެ ކުއްޖެއްގެ ބައްޕަ ހައްޔަރުކޮށްފިއެވެ. މި ހާދިސާގައި 4 މީހުން މަރުވެފައިވާއިރު، 9 މީހުން ޒަޚަމްވެފައިވެއެވެ.

54 އަހަރުގެ ކޮލިން ގްރޭ ހައްޔަރުކޮށްފައިވަނީ ބުރާސްފަތި ދުވަހުއެވެ. އޭނާގެ މައްޗަށް ދެވަނަ ދަރަޖައިގެ މަރުގެ ކުށް އަދި ކުޑަކުދިންނަށް އަނިޔާކުރުމުގެ ކުށުގެ ދަޢުވާ އުފުލާފައިވެއެވެ. މި މަޢުލޫމާތު ހާމަކޮށްފައިވަނީ ޖޯޖިއާ ބިއުރޯ އޮފް އިންވެސްޓިގޭޝަން (ޖީބީއައި) އިންނެވެ.

ބުދަ ދުވަހު ވިންޑަރ ސިޓީގެ އަޕަލަޗީ ހައި ސްކޫލްގައި ހިނގި މި ހާދިސާގައި 2 ޓީޗަރުންނާއި 2 ދަރިވަރުން މަރުވެފައިވެއެވެ. އަދި 9 މީހުން ޒަޚަމްވެފައިވެއެވެ.

ޖީބީއައިގެ ޑިރެކްޓަރ ކްރިސް ހޯސީ ވިދާޅުވި ގޮތުގައި ކޮލިން ގްރޭގެ މައްޗަށް މި ދަޢުވާތައް އުފުލާފައިވަނީ އޭނާގެ ދަރިފުޅު ހަތިޔާރު ގެންގުޅުމަށް ހުއްދަ ދީފައިވާތީއެވެ. މި މައްސަލައިގެ ތަޙުޤީޤު ފުރިހަމަކުރުމަށް ގަދައަޅައި މަސައްކަތްކުރާނެ ކަމަށް އޭނާ ވިދާޅުވިއެވެ.

ހާދިސާގައި ބޭނުންކޮށްފައިވާ އޭއާރް-ސްޓައިލް ހަތިޔާރަކީ 2023 ވަނަ އަހަރުގެ ޑިސެމްބަރު މަހު ކޮލިން ގްރޭ ގަނެފައިވާ ހަތިޔާރެއްތޯ ބަލަމުންދާ ކަމަށް ސީބީއެސް ނިއުސްއިން ބުނެފައިވެއެވެ. އެ ނޫހުން ބުނެފައިވާ ގޮތުގައި މިއީ ކްރިސްމަސް ހަދިޔާއެއްގެ ގޮތުގައި އޭނާގެ ދަރިފުޅަށް ދީފައިވާ ހަތިޔާރެކެވެ.

2023 ވަނަ އަހަރުގެ މޭ މަހު، ސްކޫލަކަށް ހަމަލާ ދޭނެ ކަމުގެ އިންޒާރު އޮންލައިންކޮށް ދީފައިވާކަމުގެ މަޢުލޫމާތު ލިބުމާ ގުޅިގެން އެފްބީއައިއިން ވަނީ ކޮލްޓް ގްރޭ އާއި އޭނާގެ ބައްޕައާ ސުވާލުކޮށްފައެވެ. އޭރު 13 އަހަރުގެ ކުއްޖާ ބުނެފައިވަނީ އެފަދަ އެއްވެސް ކޮމެންޓެއް ޕޯސްޓްކޮށްފައި ނުވާނެ ކަމަށެވެ. އަދި އޭނާގެ ބައްޕަ ބުނެފައިވަނީ ގޭގައި ހަންޓިންގ ބަޑިތައް ހުރި ނަމަވެސް، އެ ކުއްޖާއަށް އެ ބަޑިތަކުގައި އަތްނުލެވޭނެ ކަމަށެވެ.

ބެރޯ ކައުންޓީގެ ޝެރިފް ޖަޖް ސްމިތް ވިދާޅުވި ގޮތުގައި މި ހާދިސާގައި ޒަޚަމްވި 9 މީހުންގެ ތެރެއިން ގިނަ ބަޔަކު ވަނީ ހޮސްޕިޓަލުން ދޫކޮށްލާފައެވެ. އަދި އެ ހުރިހާ މީހުންވެސް ހާލު ރަނގަޅުކަމަށް އުންމީދުކުރެވެއެވެ.

މިއީ ސްކޫލަކަށް ހަމަލާ ދިން ކުއްޖެއްގެ މައިންބަފައިންގެ މައްޗަށް ދަޢުވާ އުފުލި ދެވަނަ ފަހަރެވެ. މީގެ ކުރިން މިޗިގަންގައި ހިނގި މިފަދަ ހާދިސާއެއްގައި ކުއްޖާގެ މައިންބަފައިންގެ މައްޗަށް މެންސްލޯޓަރގެ ދަޢުވާ އުފުލައި، 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށް ލުމަށް ޙުކުމްކޮށްފައިވެއެވެ.