ބްރޮންޒް މެޑަލް ހޯދި ރާއްޖޭގެ ޕެރެލިމްޕިކްސް އެތުލީޓުންނަށް އަނެއްކާވެސް ކާމިޔާބީއެއް

ބްރޮންޒް މެޑަލް ހޯދި ރާއްޖޭގެ ޕެރެލިމްޕިކްސް އެތުލީޓުންނަށް އަނެއްކާވެސް ކާމިޔާބީއެއް ލިބިއްޖެއެވެ.

މިދިޔަ މަހުގެ 28 ވީހުގައި ފެށިގެން މިމަހުގެ 8 އާއި ހަމައަށް ކުރިއަށްދާ ޕެރިސް ޕެރެލިމްޕިކްސް ގޭމްސް 2024 ގައި ރާއްޖޭގެ ފަރާތުން ވާދަކުރާ ދެ އެތުލީޓުންނަކީ ފާތިމަތު އިބްރާހީމްއާއި އަބްދުލް ރައްޒާގު އަބްދުލް ސަމަދެވެ.

ދުނިޔޭ ފެންވަރުގައި ބޭއްވޭ އެންމެ ބޮޑު އެއް ކުޅިވަރު މުބާރާތްކަމަށްވާ ޕެރެލިމްޕިކްސްގައި މި ދެ އެތުލީޓުން ވާދަކޮށްފައިވަނީ 100 މީޓަރު ދުވުމުގައެވެ. 100 މީޓަރު ދުވުމުގައި މި ދެ އެތުލީޓުންވެސް ވަނީ އެ ދެ އެތުލީޓުންގެ އަމިއްލަ ރިކޯޑު މުގުރާލާފައެވެ.

ރައްޒާގު 100 މީޓަރު ދުވުމުގެ އިވެންޓު ނިންމާފައިވަނީ 14.46 ސިކުންތުންނެވެ. އަމިއްލަ ރިކޯޑުގެ އިތުރުން، ފާތިމަތު ވަނީ 100 މީޓަރު ދުވުން 17:10 ސިކުންތުން ނިންމައި ގައުމީ ރިކޯޑު އާކޮށްފައެވެ. ފާތިމަތާއި ރައްޒާގު ހޯދި ކާމިޔާބީ ފާހަގަކޮށް ކުޅިވަރާއި ހަށިހެޔޮކަމާ ބެހޭ ވުޒާރާއިން ވަނީ އެ ދެ ދުވުންތެރިންނަށް މަރުހަބާ ކިޔާފައެވެ.

މި ދެ އެތުލީޓުންނަކީވެސް މީގެ ކުރިން ރާއްޖެއަށް ކާމިޔާބީ ގެނެސްދީފައިވާ ދެ އެތުލީޓުންނެވެ. އެގޮތުން، މީގެ ކުރިން މަޑަގަސްކަރާގައި ކުރިއަށްދިޔަ އިންޑިއަން އޯޝަން އައިލެންޑް ގޭމްސްގައި ވާދަކޮށް ރާއްޖެއަށް ލޯ މެޑަލް ގެނެސްދީފައިވެއެވެ.