އެންމެ މުހިއްމުކަމަކީ އަސާސީ ޚިދުމަތްތައް ރައްކާތެރިކަމާއެކު ފޯރުކޮށްދިނުން: މިނިސްޓަރު

އެންމެ މުހިއްމު ކަމެއް ދޭން ޖެހޭނެ ކަމަކީ އަސާސީ ޚިދުމަތްތައް ރައްކާތެރިކަމާއެކު ފޯރުކޮށްދިނުމަށްކަމަށް މިނިސްޓާ އޮފް ކޮންސްޓްރަކްޝަން އެންޑް އިންފްރަސްޓްރަކްޗާ ޑރ.ޢަބްދުﷲ މުއްތަލިބު ވިދާޅުވެއްޖެއެވެ.

މިނިސްޓަރު މުއްތަލިބު މިހެން ވިދާޅުވީ ފެނުގެ ރައްކާތެރިކަން ކަށަވަރުކުރުމަށް މާލެ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީން ކުރަމުންދާ މަސައްކަތްތަކުގެ ތެރެއިން ހުޅުމާލޭގައި ބަހައްޓާ 10ހާސް ޓަނުގެ ފެން ރައްކާކުރެވޭ ތާނގީގެ އަމަލީ މަސައްކަތް ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.

މިނިސްޓަރު ވިދާޅުވީ މާލެ ސަރަޙައްދުގައި ދިރިއުޅޭ ރައްޔިތުންނަށް ކޮންމެ ދުވަހަކަށް ބޭނުންވާ ފެނުގެ މިންވަރަކީ ބޮޑު އަދަދެއްކަމަށެވެ.

އެގޮތުން މިހާރުވެސް މާލޭގައި ދިރިއުޅޭ ރައްޔިތުންނަށް 24000 ޓަނުގެ ފެން ބޭނުންވާކަމަށާއި ހުޅުމާލޭއަށް 12000 ޓަނުގެ ފެން އާންމުކޮށް ބޭނުންވާކަމަށް މިނިސްޓަރު މުއްތަލިބު ވިދާޅުވިއެވެ.

މިކަން ފާހަގަކުރައްވާ މިނިސްޓަރު މުއްތަލިބު ވިދާޅުވީ ސަރުކާރުގެ އަމާޒަކީ އެމްޑަބްލިޔުއެސްސީއަށް ދޭންޖެހޭ އެހީތެރިކަންދީގެން މާލެ ސަރަޙައްދުގެ ފެނާ ނަރުދަމާގެ ޚިދުމަތް އެކަށީގެން ވާގޮތުގައި ފޯރުކޮށްދިނުމަށް ކުރަންޖެހޭ ކަންކަން ކުރުންކަމަށެވެ.

އޭނާ ވިދާޅުވީ މުހިއްމީ ބޮޑެތި އިމާރާތްތައް އެޅުން ނޫންކަމަށާއި ނަމަވެސް މުހިއްމީ ރައްޔިތުންނަށް ފޯރުކޮށްދެ އަސާސީ ޚިދުމަތްތައް ރައްކާތެރިކަމާއެކު ފޯރުކޮށްދިނުންކަމަށެވެ.

ސަރުކާރުން މަސައްކަތް ކުރާނީ ރައްޔިތުންނަށް ފޯރުކޮށްދެން ޖެހޭ އަސާސީ ޚިދުމަތް ރަނގަޅަށް ފޯރުކޮށްދިނުމަށް ދޭން ޖެހޭ ވަޞީލަތްތައް ފޯރުކޮށްދީ ރައްކާތެރިކަން ކަށަވަރުކުރުން" މިނިސްޓަރު ވިދާޅުވިއެވެ.

މީގެއިތުރުން މާލޭގެ ބިމުގެ ދަތިކަން ބޮޑުކަމަށް ވިދާޅުވެ މިނިސްޓަރު ވަނީ 2018 ވަނަ އަހަރު ސިނަމާލެ ބްރިޖް ހުޅުވިއިރު މާލެއާ ހުޅުމާލޭއާ ދެމެދު ފެން ފޯރުކޯށްދިނުމަށް ހޮޅިއެއް އަޅާފައިވާކަން ފާހަގަކުރައްވާފައެވެ. ނަމަވެސް ވޭތުވެދިޔަ 5 އަހަރުގެ ތެރޭގައި އެ ހޮޅި މެދުވެރިކޮށް ފެން ފޯރުކޮށްދިނުމުގެ ކަންކަމަށް އޭރުގެ ސަރުކާރުން ސަމާލުކަން ދީފައި ނެތަކަމަށް މުއްތަލިބު ވިދާޅުވިއެވެ.

މުއްތަލިބު ވިދާޅުވީ މިހާރު މާލެ އާއި ހުޅުމާލެއާ ދެމެދު ބްރިޖް މެދުވެރިކޮށް ފެން ފޯރުކޮށްދިނުމަށްޓަކައި ކުރަން ޖެހޭ މަސައްކަތްތައް ފަށާފައިވާކަމަށާއި އޭގެ ސަބަބުން ފެނަށްޖެހުންފަދަ ކަމެއް ދިމާވިނަމަވެސް ފެން ފޯރުކޮށްދިނުމާއި މެދުނުކެނޑި ފެން ރައްކާކުރާ އިތުރު ސްޓޯރޭޖްތަކާއެކު އިތުރަށް ނިޒާމު ވަރުގަދަވާނެކަމަށެވެ.