ސައުދީ އަރަބިއްޔާގެ އަމީރާ ލަތީފާ ބިންތި އަބްދުލްއަޒީޒް އަވަހާރަވުމާ ގުޅިގެން ރައީސް ތައުޒިޔާ ވިދާޅުވެއްޖެ

ސައުދީ އަރަބިއްޔާގެ ޝާހީ ޚާންދާނަށް ނިސްބަތްވެ ވަޑައިގަންނަވާ އަލްއަމީރާ ލަތީފާ ބިންތު އަބްދުލްއަޒީޒް އާލް ސުއޫދު އަވަހާރަވުމާ ގުޅިގެން މާތްވެގެންވާ ދެ ހަރަމްފުޅުގެ ޚާދިމް އަދި ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އާލް ސައުދަށް ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.

ރައީސް ފޮނުއްވި މެސެޖުގައި ވަނީ އަލްއަމީރާ ލަތީފާ ބިންތު އަބްދުލްއަޒީޒް އާލް ސުއޫދުގެ ހެޔޮ ހަނދާންތަކުން، މި އުނދަގޫ ދަނޑިވަޅުގައި އާއިލީ ހިތާމަތަކަށް ކޮންމެވެސް ވަރެއްގެ ލުޔަކާއި ތަސައްލީއެއް ލިބުމަށް އުންމީދު ކުރައްވާ ކަމުގައި ވިދާޅުވެފައެވެ. އަދި ރަސްގެފާނަށާއި، ޝާހީ އާއިލާއަށް ކެތްތެރިކަމަށް އެދިވަޑައިގެންފައެވެ.

ތައުޒިޔާގެ މެސެޖުގައި ރައީސް ވަނީ މަރްހޫމާގެ ފުރާނަފުޅަށް ރަހުމަތް ލެއްވުން އެދި ހެޔޮ ދުއާ ކުރުމުގައި ދިވެހި ސަރުކާރާއި ރައްޔިތުން ބައިވެރިވާކަން ފާހަގަ ކުރައްވާފައެވެ.

މި މެސެޖު ނިންމަވާލައްވަމުން ރައީސް ވަނީ އަލްއަމީރާ ލަތީފާ ބިންތު އަބްދުލްއަޒީޒް އާލް ސުއޫދުގެ ފުރާނަފުޅަށް ހެޔޮ ރަހުމަތް ލައްވައި، މަރުހޫމާގެ ފާފަ ފުއްސެވުމަށް އެދި ދުއާ ކުރައްވާފައެވެ. އަދި ރަސްގެފާނަށާއި، ޝާހީ އާއިލާއަށާއި، އެ ގައުމުގެ ރައްޔިތުންނަށް މި ކުރިމަތިވި ހިތާމަވެރި ހާލަތުގައި، ހަމަޖެހުމާއި ހިތްވަރު މިންވަރުކޮށްދެއްވުން އެދިވަޑައިގެންވެސް ރައީސް ވަނީ ދުއާ ދަންނަވާފައެވެ.

ޢަރަބިއްޔާގެ އަމީރާ އަވަހާރަވުމުގެ ހިތާމާއިގައި ދުނިޔޭގެ އެކި ކަންކޮޅުތަކުން ޤައުމުތަކުގެ އިސްވެރިން ދަނީ ސަޢޫދީގެ ޝާހީ އާޢިލާއަށް ތައުޒިޔާ ފޮނުވަމުންނެވެ. ރައީސްގެ އިތުރުން އެމަނިކުފާނުގެ ނައިބު ހުސައިން މުޙައްމަދު ލަތީފުވެސް ވަނީ ސައޫދީ ޝާހީ އާޢިލާއަށް ތަޢުޒިޔާ ދަންނަވާފައެވެ.

އަމީރާ ލަތީފާ އަކީ އިޖްތިމާޢީ ކަންކަމަށް ސަމާލުކަން ދެއްވައި ރައްޔިތުންގެ ލޯތްބާއި އިޙްތިރާމް ހޯއްދެވި ބޭކަނބަލެކެވެ.