ރައީސްގެ އަމާޒަކީ އިންވެސްޓަރުންނާ ގާތް ގައުމަކަށް ރާއްޖެ ހެދުން: އުޝާމް

ރައީސް ޑރ. މުހައްމަދު މުއިއްޒުގެ އަމާޒަކީ ރާއްޖެއަކީ ބޭރުގެ އިންވެސްޓަރުންނަށް ފަހި ފުރުސަތުތަކެއް ގާއިމްކޮށްދެވިފައިވާ ތަނަކަށް ހެދުން ކަމަށާއި ފޮރިން އިންވެސްޓްމަންޓްގެ ބިލަކީ އެގޮތުގެ މަތީން ކުރެވިގެން ދިޔަ މަސައްކަތެއް ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވީ ރައީސް އޮފީހުން އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ފޮރިން އިންވެސްޓްމަންޓްގެ ބިލު ތަސްދީގު ކުރެއްވުމާ ގުޅިގެން ވާހަކަދައްކަވަމުންނެވެ.

އުޝާމް ވިދާޅުވީ މި ގާނޫނަކީ 45 އަހަރުވެފައި އޮތް ފޮރިން އިންވެސްޓްމެންޓް ގާނޫނު އާކޮށް އިންވެސްޓަރުންނަށް މިހާރަށް ވުރެ ފަހި ފުރުސަތުތަކެއް ގާނޫނީ ގޮތުން ލިބޭނެ ގޮތަށް އެކުލަވައިލާފައިވާ ގާނޫނެއް ކަމަށެވެ.

ސަރުކާރުގެ ފަރާތުން ހިތަދޫ މެދު ދާއިރާގެ މެންބަރު އަހުމަދު އަޒާން ހުށަހަޅުއްވައި ފާސް ކުރި މި ބިލުގެ ބޭނުމަކީ ރާއްޖޭގައި ބޭރުގެ ފަރާތްތަކަށް އިންވެސްޓު ކުރެވޭނެ ދާއިރާތައް ކަނޑައެޅުމާއި ގުޅޭ އުސޫލުތަކާއި އެފަދަ ފަރާތްތަކަށް ރާއްޖޭގައި އިންވެސްޓު ކުރުމުގެ ހުއްދަ ދޫކުރުމުގެ އުސޫލުތައް އަދި އެފަދަ އިންވެސްޓަރުންނަށް ލިބިދެވޭނެ ހިމާޔަތާއި ރައްކާތެރިކަމާ ގުޅޭ އުސޫލު ބަޔާން ކުރުމެވެ.

މި ގާނޫނުގެ ދަށުން ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރެވޭނީ ގާނޫނުގައި ކަނޑައަޅާ ދާއިރާތަކުގައެވެ. ގާނޫނުގައިވާ ގޮތުން ރާއްޖޭގައި އެކި ދާއިރާތަކުން ހުރި ވިޔަފާރީގެ ފުރުސަތުތަކާ ގުޅޭ ގޮތުން ބޭނުންވާ އިންވެސްޓްމެންޓްތައް ދެނެގަނެ، ދިރާސާކުރުމާއި ފީޒިބިލިޓީ ރިޕޯޓުތައް ހަދާނެއެވެ. އެކަން ކުރުމަށް ހުއްދަ ހޯދަން ޖެހޭއިރު، ހުޅުވާލާފައިވާ ދާއިރާތަކާއި ޝަރުތުތަކާ އެކު އިންވެސްޓްކުރެވޭނެ ދާއިރާތައް ވެސް ގާނޫނުގައި ވަނީ ކަނޑައަޅާފައެވެ.