އަންނަ ގޮތަށް ފުރައިގެންދާ އިންޑިއާ މީހަކު މަނީ ލޯންޑަރިންގެ ތުހުމަތުގައި ހައްޔަރުކޮށްފި

ގިނަ ގިނައިން ރާއްޖެ އެތެރެވުމަށްފަހު، އަންނަ ދުވަހު ނޫން އަނެއް ދުވަހު ފުރާ ކަމަށް ފާހަގަކުރެވޭ އިންޑިއާ މީހަކު، މަނީލޯންޑަރިންގެ ތުހުމަތުގައި ހައްޔަރުކޮށްފިއެވެ.

ކްރިމިނަލް ކޯޓުން މިއަދު ނެރުނު ބަންދު އަމުރުގައި ބުނެފައިވަނީ، އެ މައްސަލައިގައި ހައްޔަރުކުރީ ރަގޫބް ނިސްތާރު ހަލީމް ރަހުމާން ކިޔާ އުމުރުން 27 އަގަރުގެ އިންޑިއާ ރައްޔިތެއް ކަމަށެވެ.

އޭނާ ފުލުހުންގެ ބެލުމުގެ ދަށަށް ގެންގޮސްފައިވަނީ ކަސްޓަމްސްގެ ބެލުމުގެ ދަށުގައި ބެހެއްޓުމަށްފަހު އޭނާގެ މައްޗަށް ޖިނާއީ ތުހުމަތު ކުރެވުނު ހިސާބުންނެވެ.

އެ މީހާ ހައްޔަރުކުރީ ގިނަ އަދަދެއްގެ ޑޮލަރާއެކުއެވެ. އަދި އެ ޑޮލަރުތަކަކީ އެހެން މީހަކު އޭނާއާ ހަވާލުކުރި ޑޮލަރުތަކެއްކަން އެނގޭ ލިޔުންތަކެއް ފެނިފައިވާ ކަމަށް އަމުރުގައި ބުނެފައިވެއެވެ. ނަމަވެސް އެއީ ކިހިނެއް ހޯދާ ފައިސާއެއްކަން އޭނާއަށް ބުނެދެވިފައި ނުވާކަމަށް އަމުރުގައި ވަނީ ބުނެފައެވެ.

މީގެއިތުރުން އޭނާގެ ޕާސްޕޯޓުން ނަން ވެސް ބަދަލުކޮށްފައިވާ ކަން ފުލުހުން ވަނީ ކޯޓުގައި ފާހަގަކޮށްފައެވެ.

މިކަމާ ގުޅިގެން އެ މީހާ ދަތުރުތައް ކޮށްފައިވާ ގޮތުން ޝައްކުވާ ފަދަ ކަންކަން ހިމެނޭތީ އާއި، މަނީ ލޯންޑަރިންގެ ތުހުމަތުތަކެއް ކުރެވިފައި ވާތީ އޭނާ ކަސްޓޯޑިއަލް ޖަލެއްގައި ބަންދު ކުރުމަށް ކޯޓުން ވަނީ ހުކުމްކޮށްފައެވެ. ކޯޓުން އޭނާ އޭނާ ބަންދުކުރަން ހުކުމްކުރީ ފަސް ދުވަހަށެވެ.