އިރާގުގައި ހުންނަ ސްވިޒަލޭންޑްގެ އެމްބަސީ 33 އަހަރަށްފަހު އަލުން ހުޅުވައިފި

އީރާގުގެ ވެރިރަށް ބަޣުދާދުގައި ހުންނަ ސްވިޒަލޭންޑް އެމްބަސީ ތެއްތިރީސް އަހަރުގެ މެދުކެނޑުމަކަށްފަހު އަލުން ހުޅުވައިފިއެވެ. މި މަޢުލޫމާތު ހާމަކޮށްފައިވަނީ ސްވިޒަލޭންޑުގެ ފެޑެރަލް ޑިޕާޓްމަންޓް އޮފް ފޮރިން އެފެއާޒްއިންނެވެ.

ސްވިޒަލޭންޑުން ބަޣުދާދުގައި ހުންނަ އެމްބަސީ ބަންދުކޮށްފައިވަނީ 1991 ވަނަ އަހަރު ހިނގި ގަލްފް ހަނގުރާމައާ ގުޅިގެންނެވެ. އެމްބަސީ އަލުން ހުޅުވުމުގެ މަޤްޞަދަކީ ދެ ޤައުމުގެ ދެމެދުގައި ކުރިން އޮތް ފަދައިން، ގުޅުން ބަދަހިކޮށް ހުރިހާ ދާއިރާއަކުން މުޢާމަލާތްކުރަން ފެށުން ކަމަށް ސްވިޒަލޭންޑުގެ ބަޔާނުގައި ބުނެފައިވެއެވެ.

މި ދެ ޤައުމުގެ ދެމެދުގައި ކުރެވޭ މުޢާމަލާތްތަކުގެ ތެރޭގައި އެއްގައުމުން އަނެއް ގައުމަށް މީހުން ހިޖުރަކުރާ މައްސަލައާއި އިޤްތިޞާދު އަދި ސަލާމަތީ ހަރަކާތްތައް ވެސް ހިމެނެއެވެ.

އީރާގަކީ ސްވިޒަލޭންޑަށް ވަރަށް މުހިންމު ގައުމެއްކަމަށް ފޮރިން އެފެއާޒްގެ އިޢުލާނުގައި ފާހަގަކޮށްފައިވެއެވެ.

އެމްބަސީ ބަންދުކޮށްފައި ހުރި މުއްދަތުގައި، އީރާގާއި ސްވިޒަލޭންޑާ ދެމެދު މުޢާމަލާތްކޮށްފައިވަނީ މެދުއިރުމަތީގެ އެހެން ގައުމުތަކުގައި ހުންނަ ސްވިސް އެމްބަސީތައް މެދުވެރިކޮށެވެ. މީގެ ތެރޭގައި އުރުދުންގައި ހުންނަ ސްވިސް އެމްބަސީ ހިމެނެއެވެ.

1991 ވަނަ އަހަރު އެމެރިކާ ސިފައިން އީރާގަށް އަރައިގަނެ ސައްދާމް ހުސައިންގެ ވެރިކަން ވައްޓާލުމާ ގުޅިގެން، އީރާގުގެ ސިޔާސީ އަދި އިޖްތިމާޢީ ހާލަތު ވަނީ ނާޒުކުވެފައެވެ. ބޭރު ޤައުމުތަކުގެ އެމްބަސީތަކަށް ހަމަލާދިނުމަކީ ހަނގުރާމަވެރި ގުރޫޕްތަކުން އާންމުކޮށް ކުރަމުން އައި ކަމެކެވެ.

އީރާގުގައި ސްވިޒަލޭންޑުގެ އެމްބަސީ އަލުން ހުޅުވުމަކީ، ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެ، އެ ސަރަހައްދުގެ ސިޔާސީ އަދި އިޤްތިޞާދީ ގުޅުންތައް ކުރިއަރައިގެން ދިއުމަށް މަގުފަހިވެގެންދާނެ ކަމެއް ކަމަށް ބެލެވެއެވެ.