ސަރުކާރުގެ އެންމެ އިސް ސިޔާސަތަކީ، "މޯލްޑިވްސް ފަސްޓް" ޕޮލިސީ: ނައިބު ރައީސް

ސަރުކާރުގެ އެންމެ އިސް ސިޔާސަތަކީ، "މޯލްޑިވްސް ފަސްޓް" ޕޮލިސީ ކަމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބު ރައީސް މިފަދައިން ވިދާޅުވީ ގައުމީ ދުވަހުގެ މުނާސަބަތުގައި ދެއްވި ހާއްސަ ވީޑިއޯ މެސެޖުގައެވެ. މި މެސެޖުގައި އެމަނިކުފާނު ވިދާޅުވީ ސަރުކާރުގެ އެންމެ އިސް ސިޔާސަތަކީ، ރައީސް ޑރ. މުޙައްމަދު މުޢިއްޒު ވިދާޅުވެފައިވާ ފަދައިން، ދިވެހި ޤައުމަށް އިސްކަންދިނުން، "މޯލްޑިވްސް ފަސްޓް" ޕޮލިސީ ކަމަށާއި، ރައީސް އަބަދުވެސް އިސްކަންދެއްވަނީ ދިވެހީންގެ މިނިވަންކަމާއި އަމިއްލަވަންތަކަން ކަށަވަރުކޮށް ބޭއްވެވުމަށް ކަމަށެވެ.

ރާއްޖޭގެ މިނިވަންކަމަށް ބުރޫއަރާނެ އެއްވެސް ކަމަކަށް މި ފަސްގަނޑުގައި ޖާގަ ނުދެއްވުމަށް ވެސް އިސްކަން ދެއްވާ ކަމަށާއި، ރައީސް ގެ މި އަމާޒަށް ވާޞިލްވުމަށް އެންމެން އަޒުމު ކަނޑައަޅައި މަސައްކަތްކުރެއްވުމަށް ނައިބު ރައީސް ވަނީ އެދިވަޑައިގެންފައެވެ.

މިއަދު ދިވެހީން އެއް ރޫޙެއްގައި އަތާ އަތްގުޅައި ޢަޒުމު ކަނޑައަޅަންވީ މި ލޮބުވެތި ވަޠަން މިނިވަންކަންމަތީ އަބަދުމެ ދެމެހެއްޓުމަށް ކަމަށާއި ބޮޑުތަކުރުފާނު ފަދަ ބަޠަލުންގެ ހިންމަތުން ޢިބްރަތް ޙާޞިލްކޮށް، މި ޤައުމުގެ ޙައްޤުގައި ޖިހާދުކުރާނެ ޚިދުމަތްތެރި ދަރީންތަކެއް ބިނާކުރުމަށް ބާރުއަޅުއްވާ ކަމަށް ވެސް ނައިބު ރައީސް ވިދާޅުވިއެވެ.

މީގެ އިތުރުން ނައިިބު ރައީސް ގެ މި ވީޑިއޯ މެސެޖުގައި ޤައުމީ ދުވަހުގެ ހެޔޮއެދުންތައް ދިވެހި ހުރިހާ ލޮބުވެތި ރައްޔިތުންނަށް އަރިސްކުރައްވައި، ޤައުމުގެ ދެކެ ލޯބިވުން އިސްކުރުމަށް އިލްތިމާސް ކުރައްވާފައިވެއެވެ.

ގައުމީ ދުވަހުގެ މުނާސަބަތުގައި ހާއްސަ ޖަލްސާއެއް އެހެން އަހަރުތަކެކޭވެސް އެއްގޮތަށް ކުރިއަށް ގެންގޮސްފައިވެއެވެ. މި ޖަލްސާގައި 7 ބޭފުޅަކަށް ޝަރަފުވެރިކަމުގެ ގައުމީ އިނާމު އަދި 10 ބޭފުޅަކާއި ކުންފުންޏަކަށް ހިތްވަރު ދިނުމުގެ ގައުމީ އިނާމު ރައީސް ވަނީ އަރުވާފައެވެ.

މި ޖަލްސާގައި ރައީސް ވިދާޅުވީ ދިވެހި ކާބަފައިންނަކީ މި ގައުމުގެ ދިފާއުގައި ހުރިހާ މާނައެއްގައި ހުރިހައި ޒަމާނެއްގައި މަސައްކަތްކުރި ބައެއް ކަމަށާއި ދިވެހިތަރިކަތައް އެ ގޮތަށް ހެކިދޭ ކަމަށެވެ. އަދި ދިވެހިންނަކީ މިނިވަންކަމުގެ ބަތަލުން ކަމުގައި ވެސް ރައީސް ވިދާޅުވެފައިވެއެވެ.