މިދިޔަ މަހު ގެވެށި އަނިޔާގެ މައްސަލަތަށް ދެގުނަ އިތުރު!

މިދިޔަ މަހު ގެވެށި އަނިޔާގެ މައްސަލަތަށް ދެގުނަ އިތުރުވެފައިވާކަމަށް ފުލުހުން އާންމުކޮށްފައިވާ ތަފާސް ހިސާބުތަކުން ދައްކައިފިއެވެ.

ފުލުހުން މަހުން މަހަށް އާންމުކުރާ ތަފާސްހިސާބު ތަކުން ދައްކާގޮތުން ޖުލައި މަހު ގެވެށި އަނިޔާގެ 19 މައްސަލައެއް ރިޕޯޓުކޮށްފައިވާއިރު، މިދިޔަ އޮގަސްޓް މަހު 31 މައްސަލަ ރިޕޯޓުކޮށްފައިވެއެވެ. މިއީ މިއަހަރުގެ މިހާތަނަށް އެންމެ ގިނައިން ގެވެށި އަނިޔާގެ މައްސަލަތައް ރިޕޯޓު ކުރެވުނު މަހެވެ. ގެވެށި އަނިޔާގެ 28 މައްސަލައާއެކު ދެވަނައަށް އެންމެ ގިނައިން ގެވެށި އަނިޔާގެ މައްސަލަތައް މިއަހަރުގެ މިހާތަނަށް ރިޕޯޓުކޮށްފައިވަނީ ޖެނުއަރީ މަހެވެ.

މިދިޔަ މަހުވެސް އެންމެ ގިނައިން ފުލުހަށް ރިޕޯޓު ކޮށްފައިވަނީ، އެހެން މަސްތަކެކޭވެސް އެއްފަދައިން ވައްކަމުގެ މައްސަލަތަކެވެ. އެގޮތުން، މިދިޔަ މަހު ވައްކަމުގެ 323 މައްސަލަ ފުލުހުންނަށް ރިޕޯޓުކޮށްފައިވާކަމަށް ފުލުހުންގެ ތަފާސް ހިސާބުތަކުން ދައްކައެވެ. މިއީވެސް ޖުލައިމަހަށްވުރެ ހަ މައްސަލަ އިތުރު އަދަދެކެވެ.

ނަމަވެސް، ފާއިތުވި ދެ މަހާ އަޅާ ބަލާއިރު އޯގަސްޓު މަހު ފޭރުމުގެ މައްސަލަތަށް ރިޕޯޓު ކޮށްފައިވާ މިންވަރު ވަނީ ދަށަށް ގޮސްފައެވެ. އެގޮތުން އޯގަސްޓު މަހު ފޭރުމުގެ 46 މައްސަލައެއް ރިޕޯޓުކޮށްފައިވާއިރު، ޖުލައި މަހު އެއަށްވުރެ 3 މައްސަލަ އިތުރެވެ.

ވައްކަމާއި ފޭރުމުގެ މައްސަލަތަކަކީ ޒަމާނުން ސުރެ ރާއްޖޭގައި އެންމެ އާންމު މައްސަލަ ތަކުގެ ތެރޭގައި ހިމެނޭ މައްސަލަތަކެކެވެ. އެގޮތުން، އެފަދަ މައްސަލަތައް ހުއްޓުވުމަށް ފުލުހުން ދަނީ ކެނޑި ނޭޅި މަސައްކަތް ކުރަމުންނެވެ.