ރަޝިޔާގެ ހަމަލާތަކެއްގައި ޔޫކްރެއިންގެ ލްވިވް ސިޓީން 7 މީހުން މަރުވެއްޖެ

ރަޝިޔާއިން އުކްރެއިންގެ ހުޅަނގު ސަރަހައްދުގައި އޮންނަ ލްވިވް ސިޓީއަށް ދިން ހަމަލާތަކެއްގައި 7 މީހުން މަރުވެއްޖެއެވެ. ލްވިވްގެ މޭޔަރު އަންދްރީ ސަދޯވީ ވިދާޅުވި ގޮތުގައި މަރުވި މީހުންގެ ތެރޭގައި 3 ކުޑަކުދިން ވެސް ހިމެނެއެވެ.

މި ހަމަލާތައް ދީފައިވަނީ ބުދަ ދުވަހުގެ ފަތިހު ޑްރޯންތަކާއި ހައިޕަރސޮނިކް މިސައިލްތައް ބޭނުންކޮށްގެންނެވެ. މަރުވި މީހުންގެ ތެރޭގައި ކުޑަ ކުއްޖަކާއި 9 އަދި 14 އަހަރުގެ ދެ އަންހެން ކުދިންނާއި އެ ސިޓީގައި މިޑްވައިފެއްގެ ގޮތުގައި މަސައްކަތްކުރި އަންހެނެއް ހިމެނެއެވެ.

މި ހަމަލާތަކުގައި އެތައް ބަޔަކު ޒަޚަމްވެ، ސިޓީގެ މަރުކަޒުގައި ހުރި 50 އަށްވުރެ ގިނަ އިމާރާތްތަކަށް ގެއްލުން ލިބިފައިވާކަމަށް މޭޔަރު ވިދާޅުވިއެވެ. ގެއްލުން ލިބުނު އިމާރާތްތަކުގެ ތެރޭގައި ގެތަކާއި، ސްކޫލްތަކާއި، އަދި ކްލިނިކްތައް ހިމެނެއެވެ.

މި ހަމަލާތައް ދިނީ އާދީއްތަ ދުވަހު ޕޮލްޓާވާ ސިޓީގައި ހުރި ސިފައިންގެ މަރުކަޒަކަށް ދިން ހަމަލާއެއްގައި މަދުވެގެން 50 މީހުން މަރުވުމާ ގުޅިގެން ޔޫކްރެއިން ހައިރާންވެ ކަންބޮޑުވެފައި ވަނިކޮށެވެ.

ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެފައިވަނީ "ރަޝިޔާގެ ނުބައި މީހުން" މި ހަމަލާތަކަށް އަގު އަދާކުރަން ޖެހޭނެ ކަމަށެވެ. އަދި ޔޫކްރެއިންއަށް އިތުރު ވައިގެ ދިފާއީ ހަތިޔާރު ބޭނުންވާ ކަމަށް ވިދާޅުވެފައިވެއެވެ.

މި ހަމަލާތަކާ ގުޅިގެން ޔޫކްރެއިންގެ މުޅި ޤައުމަށް ވައިގެ ހަމަލާގެ އިންޒާރު ދީފައިވާކަމަށް އުކްރެއިންގެ ސިފައިން ބުނެފައިވެއެވެ. ވެރިރަށް ކީވްގައިވެސް ގޮވުމުގެ އަޑުތައް އިވިފައިވާކަމަށް ރިޕޯޓުތަކުގައި ބުނެފައިވެއެވެ. ނަމަވެސް އެ ސިޓީއަށް އަމާޒުކޮށް ރަޝިއާއިން ފޮނުވާލި މިސައިލްތައް ވައިގެ ދިފާއީ ބާރުތަކުން ރައްކާތެރިކަމާއެކު ނައްތާލެވުނު ކަމަށް ބެލެވެއެވެ.