ނައިޖީރިއާގެ އަވަށަކަށް ހަމަލާދީ 81 މީހަކު މަރާލައިފި

ނައިޖީރިއާގެ ޔޯބޭ ސްޓޭޓްގެ މާފާ އަވަށަށް ބޯކޯ ހަރާމްގެ ހަނގުރާމަވެރިން ކަމަށް ބެލެވޭ ބަޔަކު އަރައި، މަދުވެގެން 81 މީހަކު މަރާލައިފިއެވެ.

ސްޓޭޓްގެ އޮފިޝަލުން ބުނާ ގޮތުގައި މަރުވި މީހުންގެ އަދަދު މިއަށްވުރެ އިތުރުވުން އެކަށީގެންވެއެވެ.

ޔޯބޭ ސްޓޭޓްގެ ފުލުހުންގެ ތަރުޖަމާނެއް ވިދާޅުވި ގޮތުގައި، ގާތްގަނޑަކަށް 150 މީހަކު 50 ސައިކަލުގައި ރައިފަލް އާއި އާރްޕީޖީ ހިފައިގެން މާފާ އަވަށަށް ހަމަލާދޭން ފަށާފައިވަނީ ހަވީރު 4:00 ހާއިރުއެވެ. މި ހަމަލާގައި ގިނަ އަދަދެއްގެ މީހުން މަރާލުމުގެ އިތުރުން، ބައެއް ފިހާރަތަކުގައި ހުޅުޖަހައި އަންދާލާފައިވެއެވެ.

"ގިނަ ބަޔަކު މަރާފައި ފިހާރަތަކުގައި ވެސް ހުޅުޖެހި. މަރުވި މީހުންގެ އަދަދު އަދިވެސް ކަށަވަރު ނުވާތީ އެ އަދަދު ދާނީ މައްޗަށް ކަމަށް ބެލެވޭ،" ފުލުހުންގެ ތަރުޖަމާނު ވިދާޅުވިއެވެ.

ނައިޖީރިއާގެ އިރުއުތުރުގައި ބޯކޯ ހަރާމް އަދި އެހެނިހެން ހަނގުރާމަވެރި ޖަމާޢަތްތަކުން މިފަދަ އަނިޔާވެރި ޢަމަލުތައް ހިންގަމުން އަންނަތާ މިހާރު ވަނީ 15 ވަރަކަށް އަހަރު ވެފައެވެ. މި މުއްދަތުގެ ތެރޭގައި 40،000 އަށްވުރެ ގިނަ މީހުން ވަނީ މަރުވެފައެވެ.

ނައިޖީރިއާގެ މެދުތެރެއާއި ހުޅަނގު އުތުރުގައި މިފަދަ އަނިޔާވެރި ޢަމަލުތައް ހިންގުމަކީ އާންމު ކަމެކެވެ. ކުށްވެރިންގެ ގޭންގުތަކުން އަވަށްތަކަށް އަރައި، މީހުން މަރައި، ވައްކަންކޮށް، ގެދޮރު ލޫޓުވާލުމަށްފަހު ހުޅުޖެހުމަކީ އާންމުވެފައިވާ ކަމެކެވެ.

މި ހާދިސާއަކީ ވެސް މިފަދަ އަނިޔާވެރި ޢަމަލުތަކުގެ އިތުރު މިސާލެކެވެ.