ސަރުކާރުން ކުލަ ކުލައިގެ ސިގްނަލެއް ނުދޭނެ، ކުރާނީ މަސައްކަތް: މިނިސްޓަރ ސަޢީދު

ރައީސް ޑރ. މުޙައްމަދު މުޢިއްޒުގެ ސަރުކާރަކީ ކުލަ ކުލައިގެ ސިގްނަލްދޭ ސަރުކާރެއް ނޫންކަމަށާ އިޤްތިސާދީ އަދި މާލީ ހާލަތު ރަނގަޅު ކުރުމަށް ސަރުކާރުން ކުރާނީ މަސައްކަތް ކަމުގައި އިޤްތިސާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.

މިއަދު ރައީސުލްޖުމްހޫރިއްޔާގެ އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ އިންވެސްޓަރުންގެ އިތުބާރު ރާއްޖެއަށް އިތުރުކުރުމަށް ސަރުކާރުން ދަނީ ކެނޑިނޭޅި މަސައްކަތްތައް ކުރަމުންކަމަށެވެ. މިގޮތުން މިނިސްޓަރ ފާހަގަކުރެއްވީ މިސަރުކާރުން ޤާއިމުކުރަމުންދާ ޑިވެލޮޕްމަންޓް ބޭންކެވެ.

މިނިސްޓަރުގެ ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވައުދުފުޅުތަކުގެ ތެރޭގައި އިޤްތިޞާދީ ދާއިރާއިން ބޮޑެތި ރީފޯމްގެ މަސައްކަތްތައް ހިމެނޭކަމަށާއި ވިޔަފާރި ފުޅާކުރުމާއި، ވިޔަފާރިތަކަށް ފަހި މާހައުލެއް ޤާއިމްކޮށްދެއްވުމަށް ސަރުކާރުން މަސައްކަތްކުރައްވަމުން ގެންދަވާކަމުގައި މިނިސްޓަރ ވިދާޅުވިއެވެ. އަދި މީގެ އިތުރުން ބޭންކެއް ވިޔަސް ސަރުކާރުގެ އިންސްޓިޓިއުޝަނެއްވިޔަސް ކަންކަމުގެ ރަނގަޅު ގޮތްތަކަށް ޖުމްލަގޮތެއްގައި މަސައްކަތް ކޮށްގެން ކުރިއަށް ދެވޭނެ ޖާގަ އޮތްކަމަށް ވާނަމަ ބައިނަލްއަގުވާމީ ފަންނީ ލަފާފުޅާއެކު ސަރުކާރުން އެކަންކަމަށް މަސައްކަތް ކުރާނެކަމަށެވެ.

މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމަކީ މިއަދު ރައީސުލްޖުމްހޫރިއްޔާ ތަސްދީގުކުރި ފޮރިން ޑައިރެކްޓް އިންވެސްޓްމަންޓް ޤާނޫނާއި ގުޅޭގޮތުން މަޢުލޫމތު ދިނުމަށް ބޭއްވުނު ބައްދަލުވުމެކެވެ. މިބިލާއި ގުޅޭގޮތުން ވާހަކަދައްކަވަމުން މިނިސްޓަރ ވިދާޅުވީ އަލަށް ފާސްވެގެންދިޔަ ފޮރިން އިންވެސްޓްމެންޓް ޤާނޫނަކީ އިންވެސްޓަރުންނާއި ރަހުމަތްތެރި ޤާނޫނެއްކަމަށެވެ. އަދި ފޮރިން ޑައިރެކްޓް އިންވެސްޓްމަންޓްގެ ދައުރު ފުޅާކޮށް އޭގެތެރެއިން އިޤްތިޞާދީ ތަރައްޤީ ގެނައުމަކީ މިސަރުކާރުގެ އަމާޒެއްކަމަށްވެސް މިނިސްޓަރ ފާހަގަކުރެއްވިއެވެ.