އިސްރާއީލަށް ވިއްކަމުންދިޔަ ބައެއް ހަތިޔާރު ވިއްކުން މެދުކަނޑާލަން އިނގިރޭސިވިލާތުން ނިންމައިފި

އިސްރާއީލަށް ވިއްކަމުންދިޔަ ބައެއް ހަތިޔާރު ވިއްކުން މެދުކަނޑާލުމަށް އިނގިރޭސިވިލާތުން ނިންމައިފިއެވެ.

މި ނިންމުން ނިންމީ، އެ ހަތިޔާރުތައް ބޭނުންކޮށްގެން ބައިނަލްއަޤްވާމީ ޤާނޫނުތަކާ ޚިލާފު ޢަމަލުތައް ހިންގުމުގެ ފުރުޞަތު އޮތްކަމަށް ބެލެވޭތީއެވެ.

އިނގިރޭސިވިލާތުން ބުނެފައިވާ ގޮތުގައި، އިސްރާއީލަށް ހަތިޔާރު އެކްސްޕޯޓް ކުރުމަށް ދޫކޮށްފައިވާ 350 ލައިސަންސްގެ ތެރެއިން 30 ލައިސަންސް ވަނީ ހިފެހެއްޓިފައެވެ.

މި ނިންމުން ނިންމީ، އިސްރާއީލުން ޣައްޒާގައި ހިންގަމުންދާ ހަމަލާތަކާ ގުޅިގެން ހަތިޔާރު ވިއްކުމުގެ އެއްބަސްވުން މުރާޖަޢާކުރުމަށްފަހުގައެވެ.

އިނގިރޭސިވިލާތުގެ ޚާރިޖީ ވަޒީރު ޑޭވިޑް ލެމީ ވިދާޅުވެފައިވަނީ، މި ނިންމުމުގެ ދަށުން ވިއްކުން ހުއްޓާލާ ހަތިޔާރުތަކުގެ ތެރޭގައި ޣައްޒާގެ މިހާރުގެ ހަނގުރާމައިގައި ބޭނުންކުރެވިދާނެ ހަތިޔާރުތައް ހިމެނޭ ކަމަށެވެ. މީގެ ތެރޭގައި ހަނގުރާމަވެރި މަތިންދާބޯޓު، ހެލިކޮޕްޓަރު އަދި ޑްރޯން ފަދަ ހަތިޔާރުތައް ހިމެނެއެވެ.

މި ނިންމުމަކީ އިނގިރޭސިވިލާތުގެ އާ ސަރުކާރުން އަޅާފައިވާ ފިޔަވަޅެކެވެ. ލޭބަރ ޕާޓީ ވެރިކަމަށް އައުމާއެކު، ޚާރިޖީ ވަޒީރު ވަނީ އިސްރާއީލަށް ހަތިޔާރު ވިއްކާ މިންވަރު ބެލުމަށް ރިވިއުއެއް ހެދުމަށް އަންގަވާފައެވެ.