އިންޑިއާގެ ދެކުނުގެ ސްޓޭޓްތަކަށް ކުރަމުންދާ ވިއްސާރައިގައި މިހާތަނަށް 25 މަރު

އިންޑިއާގެ ދެކުނު ސަރަހައްދުގައި މިވަގުތު ކުރަމުންދާ މޫސުމީ ވިއްސާރައިގެ ސަބަބުން މިހާތަނަށް މަރުވި މީހުންގެ އަދަދު 25 އަށް އަރައިފިއެވެ.

މި ނުރައްކާތެރި ހާދިސާގައި ގިނަ އަދަދެއްގެ މީހުން ވަނީ ހާލުގައި ޖެހި، ވަގުތީ ހިޔާވަހިކަމަށް ބަދަލުކުރެވިފައެވެ.

ތެލަންގާނާ އަދި އަންދްރާ ޕްރަދޭޝް ސްޓޭޓްތަކަށް އެންމެ ބޮޑު އަސަރެއް ކޮށްފައިވާއިރު، ތެލަންގާނާގައި 16 މީހުންނާއި އަންދްރާ ޕްރަދޭޝްގައި 9 މީހުން ވަނީ މަރުވެފައެވެ.

ތެލަންގާނާގެ ޑިޒާސްޓާ ރެސްޕޮންސް އެންޑް ފަޔާ ސާވިސްގެ ޑިރެކްޓަރު ޖެނެރަލް ވައި ނާގީ ރެޑީ ވިދާޅުވި ގޮތުގައި ގިނަ ގެތަކަށް ގެއްލުން ލިބި، ފާއިތުވި 24 ގަޑިއިރުގެ ތެރޭގައި 400 މިލިމީޓަރު ވާރޭ ވެހިފައިވެއެވެ.

ތެލަންގާނާ ސަރުކާރުން ވަނީ މި ހާދިސާ ގައުމީ ކާރިސާއެއްގެ ގޮތުގައި ކަނޑައެޅުމަށް އިންޑިއާގެ ފެޑެރަލް ސަރުކާރަށް އެދިފައެވެ.

މިހާތަނަށް 3،800 އަށްވުރެ ގިނަ މީހުން ސަލާމަތްކޮށް ވަގުތީ ހިޔާތަކަށް ބަދަލުކުރެވިފައިވާއިރު، އިންޑިއާގެ ވައިގެ ސިފައިން ވަނީ 200 އަށްވުރެ ގިނަ ރެސްކިއު އޮފިސަރުންނާއި 30 ޓަނުގެ ކުއްލި އެހީ ފޮނުވާފައެވެ.

މިފަދަ ވިއްސާރަތަކުން އިންޑިއާއަށް ކޮންމެ އަހަރަކު ވެސް ބޮޑެތި ގެއްލުންތައް ލިބެއެވެ. މިދިޔަ ހަފުތާގައި ގުޖުރާތު ސްޓޭޓަށް ކުރި ވިއްސާރައިގައި 28 މީހުން މަރުވިއެވެ. އަދި އަވައްޓެރި ބަންގްލަދޭޝްގައި ވެސް މިދިޔަ މަހު ފެންބޮޑުވެ، 40 މީހުން މަރުވެ، 300،000 އަށްވުރެ ގިނަ މީހުން ހާލުގައި ޖެހުނެވެ.