ސްވިޑަންގެ ކުޑަކުދިން ސްކްރީނުން ދުރުކުރުމަށް އެގައުމުގެ ސަރުކާރުން އެދެފި

ކުޑަކުދިން ޑިޖިޓަލް ވަސީލަތްތަކާ ދުރުކުރުމަށް ސްވިޑަންގެ ސަރުކާރުން ބެލެނިވެރިންގެ ކިބައިން އެދުމާއެކު އާ އިރުޝާދުތަކެއް ނެރެފިއެވެ.

ދަގާޑިއަން އިން ރިޕޯޓްކޮށްފައިވާ ގޮތުގައި، މި އިރުޝާދުތަކުގައި، ދެ އަހަރުން ދަށުގެ ކުދިން އެއްވެސް ވަރަކަށް ސްކްރީން ނުބެލުމަށާއި، އެހެން އުމުރުފުރާތަކުގެ ކުދިންގެ ސްކްރީން ޓައިމް ވަކި މިންވަރަކަށް ހަނިކުރުމަށް އަންގާފައިވެއެވެ.

ސްވިޑަންގެ ޕަބްލިކް ހެލްތު އެޖެންސީން ބުނާ ގޮތުގައި ދެ އަހަރާއި ފަސް އަހަރާ ދެމެދުގެ ކުދިންނަށް ދުވާލަކު އެއް ގަޑިއިރަށްވުރެ ގިނައިން ސްކްރީން ބެލުމުގެ ފުރުސަތު ދީގެން ނުވާނެއެވެ. އަދި 6 އަހަރާއި 12 އަހަރާ ދެމެދުގެ ކުދިންނަށް ދެ ގަޑިއިރަށްވުރެ ގިނައިން ސްކްރީން ބެލުމުގެ ފުރުސަތު ދީގެން ނުވާނެކަމަށް ބުނެފައިވެއެވެ.

ޕަބްލިކް ހެލްތު މިނިސްޓަރު ޖެކޮބް ފޯސްމެޑް ވިދާޅުވީ، މިހާރު ޓީންއޭޖަރުން ދުވާލަކު އެވްރެޖްކޮށް 6 ގަޑިއިރު ސްކްރީން ކުރިމަތީގައި ހޭދަކުރާ ކަމަށާއި، މިކަމުގެ ސަބަބުން އިޖުތިމާއީ ގުޅުންތަކަށް ނޭދެވޭ އަސަރުކުރާ ކަމަށެވެ.

މި އާ އިރުޝާދުތަކުގެ މަޤްޞަދަކީ ކުޑަކުދިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ވަރުގަދަކުރުމެވެ.

ސްކްރީން ޓައިމް އިތުރުވުމުން ކުޑަކުދިންނަށް ގިނަގުނަ މައްސަލަތަކެއް ދިމާވެއެވެ. ގިނަ ވަގުތު ސްކްރީން ކުރިމަތީގައި ހޭދަކުރުމުން ކުދިންގެ ލޮލަށް ގެއްލުން ލިބި، ނިދުމުގެ ވައްޓަފާޅި ބަދަލުވެ، ހަށިގަނޑުގެ ބަރުދަން އިތުރުވުމުގެ ފުރުސަތު ބޮޑުވެއެވެ.

މީގެ އިތުރުން، އިޖުތިމާއީ ގުޅުންތައް ބަލިކަށިވެ، މުއާމަލާތްކުރުމުގެ ހުނަރުތައް ދަށްވެ، ސަމާލުކަން ދިނުމުގެ ޤާބިލުކަން ދަށްވެއެވެ.

އަދި ހަމައެހެންމެ، ކުޑަކުދިންގެ ތަޢުލީމީ ކުރިއެރުމަށާއި އުފެއްދުންތެރިކަމަށްވެސް ނޭދެވޭ އަސަރުކުރެއެވެ. އެހެންކަމުން، ކުޑަކުދިންގެ ޖިސްމާނީ އަދި ނަފްސާނީ ދުޅަހެޔޮކަން ހިފެހެއްޓުމަށްޓަކައި ސްކްރީން ޓައިމް މެނޭޖްކުރުމަކީ ވަރަށް މުހިންމު ކަމެކެވެ.