ކާބޯތަކެތި ތައްޔާރު ކުރާ ތަނެއް ރެއިޑްކޮށް ދެ ބިދޭސީން ހައްޔަރަށް

ކާބޯތަކެތި ތައްޔާރު ކުރާ ތަނެއް ރެއިޑްކޮށް ދެ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މިކަން ހާމަކޮށް އިމިގްރޭޝަނުން ވަނީ އެކްސްގައި ޕޯސްޓެއް ކޮށްފައެވެ. މި ޕޯސްޓުގައި އިމިގްރޭޗަނުން ބުނީ އިއްޔެ ދެ ތަނެއް ބަލައި ފާސްކޮށްފައިވާ ކަމަށާއި މި ދެތަން ބަލައި ފާސްކޮށްފައިވަނީ ގަވާއިދާ ހިލާފަށް އުޅޭ ބިދޭސީން ދިވެހިން އާންމުކޮށް ދުފުމުގައި ބޭނުންކުރާ ތަކެތި ވިޔަފާރިއަށް ތައްޔާރުކުރަމުންދާކަމަށް "އިމިގްރޭޝަން ވޮޗް" އަށް ލިބުނު މައުލޫމާތަކާއި ގުޅިގެން ކަމަށެވެ.

އިމިގްރޭޝަނުން ބުނެފައިވަނީ މި އޮޕަރޭޗަނުގައި ބަލައި ފާސްކުރި ދެވަނަ ތަނުގައި ޑެލިވެރީއަށް ކާބޯތަކެތި ތައްޔާރުކުރަމުންދާ ކަމަށާއި ކަމާގުޅުންހުރި އިދާރާތަކުގެ އެހީތެރިކަމާއެކު މިތަނުގައި ކުރަމުން ދިޔަ ވިޔަފާރި ހުއްޓުވުމަށް ނޯޓިސް ދީފައިވާ ކަމަށެވެ.

އިމިގްރޭޝަނުން ބުނެފައިވަނީ މި އޮޕަރޭޝަނުގައި 02 ބިދޭސީއަކު ވަނީ އިމިގްރޭޝަން ބެލުމުގެ ދަށަށް ގެންގޮސްފައިވާ ކަމަށް ވެސް އެ ޕޯސްޓުގައިވެއެވެ.

ރާއްޖޭގައި ގަވާއިދާ ހިލާފަށް މަސައްކަތްކުރާ ބިދޭސީންގެ މައްސަލަވަނީ ބޮޑުވެފައެވެ. މި މައްސަލަ ހައްލުކުރުމަށް ކަމާއި ގުޅުން ހުރި އިދާރާއަކާއި ގުޅިގެން އިމިގްރޭޝަނުން އަންނަނީ އޮޕަރޭޝަންތަކެއް ހިންގަމުންނެވެ. މި އޮޕަރޭޝަންތަކުގައި ގިނަ އަދަދެއްގެ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ.

މިފަދައިން އުޅޭ ބިދޭސީން ހޯދުމަށް 211 އިމިގްރޭޝަން އޮފިސަރާއެކު އޮގަސްޓު 28 ވަނަ ދުވަހު ބޮޑު ހަރަކާތެއް ކުރިއަށް ގެންގޮސްފައިވެއެވެ. މި ހަރަކާތުގައި ސާ ފުރިހަމަ ނޫން 273 ބިދޭސީންނަށް ނޯޓިސް ދީ ގަވާއިދާ ހިލާފަށް އެމީހުން ލައްވާ މަސައްކަތްކުރުވާ 120 ދިވެހިންނަށް ލިޔުމުން ނަސޭހަތް ދީފައިވެއެވެ. އަދި ބިދޭސީންގެ ތެރެއިން ފިލައިގެން އުޅޭކަމަށް ރިޕޯޓުކޮށްފައިވާ 10 މީހަކު ހޯދާ، އިމިގްރޭޝަން ބެލުމުގެ ދަށަށް ގެންގޮސްފައިވެއެވެ.

މީގެ އިތުރުން އިމިގްރޭޝަނުން ވަނީ ގަވާއިދާ ހިލާފަށް ރާއްޖޭގައި އުޅޭ ބިދޭސީން ރިޕޯޓުކުރުމަށް ހާއްސަ އޮންލައިން ޕްލެޓްފޯމެއް ތައާރަފްކޮށްފައެވެ. މި އޮންލައިން ޕްލެޓްފޯމްއަށް ކިޔަނީ އިމިގްރޭޝަން ވޮޗްއެވެ.