ރޮނާލްޑޯއާއި ބުފޮންގެ މޮޅުކުޅުން އަގުވަޒަންކޮށް ޔޫއެފާއިން ހާއްސަ އެވޯޑެއް ދީފި

ރޮނާލްޑޯއާއި ބުފޮންގެ މޮޅުކުޅުން އަގުވަޒަންކޮށް ޔޫރަޕިއަން ފުޓްބޯލް އެސޯސިއޭޝަން (ޔޫއެފާ)އިން ހާއްސަ އެވޯޑެއް ދީފިއެވެ.

ޕޯޗުގަލްގެ ތަރި ކްރިސްޓިއާނޯ ރޮނާލްޑޯއާއި އިތަލީގެ ލެގެންޑް ޖިއާންލުއިޖީ ބުފޮންއަށް ޔޫއެފާއިން ރޭ ދީފައިވަނީ އެ ދެކުޅުންތެރިން ދަނޑުމަތީގައި ދެއްކި މޮޅު ކުޅުން އަގުވަޒަންކުރުމުގެ ގޮތުން ދީފައިވާ އެވޯޑެކެވެ.

އެގޮތުން، ރޭ ސްވިޒަލޭންޑްގައި ބޭއްވި ހަފްލާގައި އަލް ނަސްރަށް މިހާރު ކުޅެމުންދާ 39 އަހަރުގެ ރޮނާލްޑޯއަށް ޔޫއެފާއިން ދީފައިވަނީ ޔޫއެފާ ޗެމްޕިއަންސް ލީގުގެ ތާރީހުގައި އެންމެ ގިނަ ލަނޑު ކާމިޔާބުކުރި ފުޓުބޯޅަ ކުޅުންތެރިޔާގެ އިނާމެވެ. އޭނާ ވަނީ ޗެމްޕިއަންސް ލީގުގައި ކުޅުނު 183 މެޗުން 140 ގޯލް ޖަހައިދީފައެވެ. މިއީ މެސީ ޗެމްޕިއަންސް ލީގުގައި ޖަހާފައިވާ ލަނޑުތަކަށްވުރެ 11 ލަނޑު އިތުރު އަދަދެކެވެ. އަދި ލެވަނޑޮވްސްކީއަށްވުރެ 46 ލަނޑު އިތުރު އަދަދެކެވެ.

ޕޯޗުގަލް ފޯވާޑް ވަނީ މެންޗެސްޓާ ޔުނައިޓެޑާއެކު އެއްފަހަރު އަދި ރެއާލް މެޑްރިޑާއެކު ހަތަރު ފަހަރު މުބާރާތް ކާމިޔާބުކޮށް، 1992 ވަނަ އަހަރަށްފަހު މި މުބާރާތުގެ ތާރީހުގައި، ޗެމްޕިއަންސް ލީގު ފަސް ފަހަރު ކާމިޔާބުކުރި ފުރަތަމަ ކުޅުންތެރިޔާގެ މަގާމު ހާސިލްކޮށްފައެވެ. އަދި 2008، 2014، 2017 ގައި ކުޅުނު ޗެމްޕިއަންސް ލީގުގެ ފައިނަލް ތަކުގައި ލަނޑުޖަހައި މި މުބާރާތުގެ ވަކިވަކިން ތިން ފައިނަލް ލަނޑު ޖަހާފައިވާ ހަމައެކަނި ކުޅުންތެރިޔާގެ ޝަރަފުވެސް ހާސިލްކޮށްފައެވެ.

އަދި ބުފޮންއަށް ދީފައިވަނީ ގިނަ ދުވަސްތަކެއް ވަންދެން ޗެމްޕިއަންސް ލީގުގައި ކާމިޔާބު ކެރިއަރެއް ދެމެހެއްޓުމުގެ އެވޯޑެވެ. މި އެވޯޑަކީ ފާހަގަކޮށްލެވޭ ކާމިޔާބީތަކާއި ޕްރޮފެޝަނަލް އެކްސެލެންސް އަދި ނަމޫނާ ސިފަތަކުގެ އަގުވަޒަންކުރާ އެވޯޑެކެވެ. 28 އަހަރުގެ ކުޅުމުގެ ކެރިއަރުގައި ފާހަގަކޮށްލެވޭ ކުޅުމެއް ދެއްކި ކުޅުންތެރިޔާ ބުފޮން ފަދަ ކީޕަރުން މަދެވެ.