އެމްޑީޕީގެ ސަރުކާރުން ކޮވިޑޭ ކިޔައިގެން ލޯނު ނަގައިގެން ކުރި ކަމެއް ނެތް: ޝިޔާމް

ކޮވިޑުގެ ނަމުގައި ލޯނު ނަގައިގެން މިދިޔަ ސަރުކާރުން ވައްކަން ނޫންކަމެއް ކޮށްފައި ނުވާކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.

މިނިސްޓަރު ޝިޔާމް މިހެން ވިދާޅުވީ މިރޭ ކުރިއަށްދާ ޕީއެންސީ ހަރުގެ ޖަލްސާގައި ވާހަކަ ދައްކަވަމުންނެވެ.

ޝިޔާމް ވިދާޅުވީ މިދިޔަ ސަރުކާރުން ހުރިހާ ކަމެއް އަޅުވާފައިވަނީ ކޮވިޑުގެ ބޮލުގައިކަމަށެވެ.

އޭނާ ވިދާޅުވީ ކުރީގެ ރައީސް އިބްރާހިމް މުހައްމަދު ޞާލިހްހެ ނިމިދިޔަ ފަސް އަހަރުގެ ވެރިކަމުގައި 39 ލޯނެއް ނަގާފައިވާކަމަށާއި 42،1 ބިލިއަން ރުފިޔާގެ ލޯނުކަމަށެވެ.

އަދި އެ ސަރުކާރުން އުފެއްދި ދަރަނި 60 ބިލިއަން ރުފިޔާއަށްވުރެ ބޮޑުކަން މިނިސްޓަރު ފާހަގަކުރެއްވިއެވެ.

"42 ބިލިއަން އެއީ ހަމައެކަނި ލޯނުގެ ގޮތުގައި، ކޮވިޑުގެ ނަމުގައި އެބަ އޮތް 10 ލޯނު ނަގާފައި، 2.4 ބިލިއަން ރުފިޔާ ކޮވިޑުގެ ނަމުގައި ނަގާފައި އެއީ މުޅި ސަރުކާރުގެ ފަސް އަހަރުން ނަގާފައި ހުރި ލޯނުގެ 5 އިންސައްތަ" މިނިސްޓަރު ޝިޔާމް ވިދާޅުވިއެވެ.

"ދެން ކޮވިޑަށް ހުރިހާ އެއްޗެއް ކަނޑައިގެން ސަލާމަތްވާން އަމީރުއާއި ފައްޔާޒުއާ މި މަސައްކަތް ކުރައްވަނީ" މިނިސްޓަރު އިތުރަށް ވިދާޅުވިއެވެ.

މިނިސްޓަރު ޝިޔާމް ވިދާޅުވީ ދިވެހި ރައްޔިތުން ތިބީ ހޭލާކަމަށާއި މިކަންކަމުގެ ތަފްސީލީ ރިޕޯޓުތައް މިހާރު ހާމަކޮށްފައިވާކަމަށެވެ. އަދި އެ ރިޕޯޓުތަކުން އެމްޑީޕީން ދައްކަނީ ދޮގު ވާހަކަތަކެއް ހާމަވާކަމަށްވެސް ވިދާޅުވިއެވެ.

"60 ބިލިއަން ރުފިޔާގެ ދަރަނި އުފައްދއިގެން، އޭގެ ތެރޭގައި 42 ބިލިއަން ރުފިޔާއަކީ ލޯނު. ކޮންކަމެއްތޯ ކުރީ، އާމްދަނީ އިތުރުވާނެ އެއްވެސް ކަމެއް މި ފައިސާއިން ކޮށްފައި ނެތް" މިނިސްޓަރު ވިދާޅުވިއެވެ.

މީގެއިތުރުން މިނިސްޓަރު ޝިޔާމް ވިދާޅުވީ އިދިކޮޅު އެމްޑީޕީން ކޮވިޑްތެރޭގައި ކުރިއްޔާ ކުރި ކަމަކީ ވައްކަން ކަމަށެވެ.