ރާއްޖޭގައި ޑޮލަރު ހިފެހެއްޓޭ މިންވަރު އިތުރުކުރަން ގާނޫނުތަކަށް ބަދަލު ގެންނަނީ

ދިވެހިރާއްޖެއަށް ދިމާވެފައިވާ ޑޮލަރުގެ ދަތިކަން ހައްލުކުރުމަށް ގާނޫނުތަކަށް ބަދަލިގެންނަން ނިންމާފައިވާކަމަށް ބަންޑާރަނައިބު އަހްމަދު އުޝާމް ވިދާޅުވެއްޖެއެވެ.

ބަންޑާރަނައިބު މިހެން ވިދާޅުވީ ޑޮލަރު ލިބުން ދަތިވެ ބޭރުގައި ވިޔަފާރިކުރަން ދީފައިވާ ކާޑު ލިމިޓްތަކަށް ބަދަލުތަކެއް ގެނައުމަށް ބީއެމްއެލްއިން މިއަދު ނިންމި ނިންމުމާއި ގުޅިގެން ވާހަކަ ދައްކަވަމުންނެވެ.

ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި އާ ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްތައް ނުކުރެވޭ ގޮތަށް މިއަދު އެ ބޭންކުން ހަމަޖެއްސި ނަމަވެސް ފަހުން ވަނީ އެ ބަދަލު އަނބުރާ ގެނެސްފައެވެ.

މި މައްސަލައާ ގުޅިގެން ރައީސް އޮފީހުގައި މިއަދު ބޭއްވި ކެބިނެޓް ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ބަންޑާރަނައިބު އުޝާމް ވިދާޅުވީ އެ ބައްދަލުވުމުގައި ރާއްޖެއަށް ދިމާވެފައިވާ ޑޮލަރުގެ ދަތިކަމަށް ހައްލެއް ގެނައުމަށް ބައެއް ގާނޫނުތަކަށް ގެންނަން ޖެހޭ އިސްލާހުތަކާ ގުޅޭ ގޮތުން މަޝްވަރާ ކުރެއްވި ކަމަށެވެ.

އެގޮތުން ޕެންޝަނާ ބެހޭ ގާނޫނަށް އިސްލާހު ގެނައުމަށާއި އިންކަމް ޓެކްސްގެ ގާނޫނަށް އިސްލާހު ގެނައުމުގެ އިތުރުން މީރާގެ ކަލެކްޝަންގެ މަސައްކަތް ހަރުދަނާ ކުރުމަށް ގަވައިދުތަކަށް ބަދަލެއް ގެންނަން ޖެހޭ ނަމަ އެކަން ކުރުމަށް މަޝްވަރާކުރެއްވިކަމަށް ވިދާޅުވިއެވެ.

އުޝާމް ވިދާޅުވިގޮތުގައި ކުރިއަށް އޮތް ދެތިން ހަފުތާގެ ތެރޭގައި ބައެއް ގާނޫނުތަކަށް އިސްލާހު ގެނެސް ޑޮލަރުގެ ދަތިކަމަށް ހައްލެއް ގެނައުމަށް މަސައްކަތް ކުރައްވާނެއެވެ.