ޑިމޮކްރެޓިކް އުސޫލުތައް ގާއިމްކުރުމަށް ޗައިނާއާ ގުޅިގެން މަސައްކަތްކުރަން ބޭނުން: އަބްދުއްރަހީމް

ޑިމޮކްރެޓިކް އުސޫލުތައް ގާއިމްކުރުމަށް ޗައިނާއާ ގުޅިގެން މަސައްކަތްކުރަން ބޭނުންފުޅުވާކަމަށް ރައްޔިތުން މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ، ޗައިނާގެ ބެއިޖިންގގައި ފަށާފައިވާ އިންޓަރ-ރީޖަނަލް ސެމިނަރ އޮން ދަ އެޗީވްމަންޓް އޮފް ދަ ސަސްޓައިނަބަލް ޑިވެލޮޕްމަންޓް ގޯލްސް ފޯރ ޑިވެލޮޕިންގ ކަންޓްރީސް 2024 ގައި ތަގުރީރުއްވަމުންނެވެ.

ރާއްޖޭގެ ކަންކަން ހަރުދަނާކުރުމަށްޓަކައި ޗައިނާއާއި އެހެން ގައުމުތަކާއެކުގައިވެސް މަސައްކަތްކުރަން ބޭނުންފުޅުވާކަމަށް އެމަނިކުފާނު ވިދާޅުވިއެވެ. ވަކިން ހާއްސަކޮށް ތަރައްގީގެ ސްޓްރެޓެޖީތައް އެކުލަވާލުމަށާއި، ދެމެހެއްޓެނިވި އުސޫލުތަކަށާއި، ޑިމޮކްރެޓިކް އުސޫލުތަކަށް ގާއިމްކުރުމަށް ޗައިނާއާ ގުޅިގެން މަސައްކަތްކުރައްވަން ބޭނުންފުޅުވާކަމަށް އެމަނިކުފާނުގެ ވާހަކާގައި ވިދާޅުވިއެވެ.

އެމަނިކުފާނު އިތުރަށް ވިދަޅުވީ، ކޮންމެ ގައުމަކުންވެސް އެގައުމެއްގެ ހާއްސަ ހާލަތްކާއި ވަސީލަތްތަކަށް ރިއާޔަތްކުރަން ޖެހޭކަން ދެނެގަތުމަކީ މުހިންމުކަމެއްކަމަށެވެ. އެގޮތުން، މި ކުޑަ ރާއްޖެއަށްވެސް އެތައް ގޮންޖެހުންތަކެއް ކުރިމަތިވެފައިވީނަމަވެސް، ފުރުސަތުތަކެއްވެސް ފަހިވެފައިވާކަން އެމަނިކުފާނުގެ ތަގުރީރުގައި ފާހަގަކުރެއްވިއެވެ.

އެގޮތުން ރާއްޖޭގެ އިގްތިސާދީ ތަރައްގީގެ ސްޓްރެޓެޖީތައް ޑިމޮކްރެޓިކް އޮނިގަނޑާއި ތިމާވެށީގެ ދެމެހެއްޓެނިވިކަމާ ގާތުން ގުޅިފައިވާކަން ފާހަގަކުރައްވައި، އެމަނިކުފާނު ވިދާޅުވީ ވިލުންތެރިކަމަށްކީ ދިވެހިންގެ ވައްޓަފާޅިކަމަށާއި ދެމެހެއްޓެނިވި ގޮތެއްގައި ކަންކަން ކުރުމަކީ ދިވެހިންގެ އަސާސްކަމަށެވެ.

ޗައިނާގެ ބެއިޖިންގގައި އާދީއްތަ ދުވަހު ފެށިފައިވާ މި ސެމިނާ ކުރިއަށްދާނީ ހުކުރު ދުވަހުގެ ނިޔަލަށެވެ. މި ސެމިނާގައި މަޖިލީހުގެ ރައީސް އަބްދުއްރަހީމްގެ އިތުރުން ވިލިމާލެ ދާއިރާގެ މެންބަރު މުޙައްމަދު އިސްމާއީލާއި، ހުޅުދޫ ދާއިރާގެ މެންބަރު މުޙައްމަދު ޝާހިދުއާއި، ބާރަށު ދާއިރާގެ މެންބަރު އިބްރާހީމް ޝުޖާއުގެ އިތުރުން، ރައްޔިތުން މަޖިލީހުގެ އަމީން އާންމު ފާތިމަތު ނިޔުޝާ ބައިވެރިވެވަޑައިގެންފައިވެއެވެ.