ބާސެލޯނާގެ ތަރި ލަމީން ޔަމާލްގެ ބައްޕައަށް ވަޅިން ހަމަލާދިން 4 މީހަކު ހައްޔަރުކޮށްފި

ބާސެލޯނާގެ ތަރި ލަމީން ޔަމާލްގެ ބައްޕައަށް ވަޅިން ހަމަލާދިން 4 މީހަކު ހައްޔަރުކޮށްފިއެވެ.

ލަމީންގެ ބައްޕަ އަށް ވަޅިން ހަމަލާދިނުމުގެ ސަބަބުން ހާލު ސީރިއަށްވެ ހޮސްޕިޓަލުގައި މިދިޔަ ބުދަ ދުވަހު އެޑްމިޓުކުރިކަމަށް ކެޓަލީނާގެ ސަރަހައްދީ ފުލުހުން ބުނެފައިވެއެވެ. އަދި ބުރާސްފަތި ދުވަހު އިންސްޓަގްރާމަށް ކުރި ޕޯސްޓެއްގައި އޭނާއަށް ހަމްދަރުދީގެ މެސެޖު ފޮނުވި އެންމެންނަށް ޝުކުރުވެރިވާކަމަށާއި، އޭނާގެ ހާލު މިހާރު ކުރިއަށްވުރެ ރަނގަޅުކަމަށް ބުނެފައިވެއެވެ.

ފުލުހުން ބުނާ ގޮތުގައި މި ހަމަލާ ދީފައި ވަނީ ޔަމަލްގެ ބައްޕަ ދިރިއުޅޭ ބާސެލޯނާ ކައިރީގައި އޮންނަ މަޓާރޯ ސިޓީގެ ޕާކިން ޒޯނެއްގައި ކަމަށެވެ. އަދި އެ ހަމަލާ ދީފައިވަނީ، ލަމީންގެ ބައްޕައާއި އެ ސަރަހައްދުގައި ދިރިއުޅޭ އެހެން ބަޔަކާ ދެމެދު ޒުވާބެއްވެސް ހިނގާފައިވަނިކޮށްކަމަށް ފުލުހުން ބުނެފައިވެއެވެ.

މި މައްސަލައާއި ގުޅިގެން ފުލުހުން ހައްޔަރުކުރި މީހުންގެ ތެރެއިން ބުދަ ދުވަހު ހައްޔަރު ކުރި 3 މީހުންގެ އެއްވެސް ކުށުގެ ރިކޯޑެއް ނެތްކަމަށާއި 4 ވަނަ މީހާ ހައްޔަރުކުރެވުނީ ބުރާސްފަތިދުވަހުގައިކަމަށް ފުލުހުން މައުލޫމާތުދީފައިވެއެވެ.