މަކުނު ވިދުރީގެ އާވޭރިއެންޓްގެ ފުރަތަމަ ކޭސް އެފްރިކާއިން ބޭރުން ސްވިޑަންއިން ފެނިއްޖެ

މަކުނު ވިދުރީގެ އާ ވޭރިއެންޓްގެ ކޭސްއެއް އެފްރިކާއިން ބޭރުން ފުރަތަމަ ފަހަރަށް ސްވިޑެންއިން ފެނިއްޖެއެވެ.

ސްވިޑެންގެ ސަރުކާރުން ބުރާސްފަތި ދުވަހު ހާމަކުރި ގޮތުގައި، އެފްރިކާއިން ބޭރުން ފުރަތަމަ ފަހަރަށް މަކުނުވިދުރީގެ ނުރައްކާތެރި ވައިރަސް ކަމަށްވާ ކްލޭޑް 1 އެ ގައުމުން ފެނިއްޖެއެވެ.

ސްވިޑެންގެ ހެލްތް އެންޑް ސޯޝަލް އެފެއާޒް މިނިސްޓަރ ޖަކޮބް ފޯސްމެޑް ވިދާޅުވީ މި ވައިރަސްގެ ނުރައްކާތެރި ބާވަތް ކަމަށްވާ ކްލޭޑް 1 ސްވިޑެންގައި ފެނިފައިވާ ކަމަށެވެ.

ސްވިޑެންގެ ސްޓޭޓް އެޕިޑިމިއޮލޮޖިސްޓް މެގްނަސް ގިސްލެން ވިދާޅުވި ގޮތުގައި މި ބަލި ޖެހުނު މީހާއަށް މި ބަލި ޖެހިފައިވަނީ އެފްރިކާގެ ސަރަހައްދަކަށް ދަތުރެއް ކުރުމުގެ ތެރޭގައެވެ. އަދި ސްޓޮކްހޯމްގައި އޭނާއަށް ފަރުވާ ދެމުންދާ ކަމަށް ވެސް އޭނާ ވިދާޅުވިއެވެ.

ދުނިޔޭގެ ސިއްހީ ޖަމްއިއްޔާ (ޑަބްލިއުއެޗްއޯ) އިން ބުދަ ދުވަހު ބުނި ގޮތުގައި މިއަހަރު ޑިމޮކްރެޓިކް ރިޕަބްލިކް އޮފް ކޮންގޯގައި މި ބަލީގައި 548 މީހުން މަރުވެފައިވެއެވެ. އަދި އެ ގައުމާ އިންވެގެންވާ ގައުމުތަކަށް މި ބަލި ފެތުރެމުންދާތީ، މިއީ ދުނިޔޭގެ ސިއްހީ ކުއްލި ނުރައްކަލުގެ ހާލަތެއް ކަމަށް ވެސް އިއުލާނުކޮށްފައިވެއެވެ.

ނަމަވެސް ސްވިޑެންގެ ސްޓޭޓް އެޕިޑިމިއޮލޮޖިސްޓް ވިދާޅުވި ގޮތުގައި މި ބަލި ޖެހުނު މީހަކަށް ފަރުވާ ދިނުމަކުން އާންމު ރައްޔިތުންނަށް ނުރައްކަލެއް ކުރިމަތިވާނެ ކަމަކަށް ނުބެލެވެއެވެ.

އަދި ޔޫރަޕިއަން ސެންޓަރ ފޯ ޑިޒީޒް ޕްރިވެންޝަން އެންޑް ކޮންޓްރޯލް (އީސީޑީސީ) އިން ވެސް ބުނަނީ މި ވަގުތު އާންމުންނަށް ވަރަށް ކުޑަ ނުރައްކަލެއް އޮތް ކަމަށެވެ.

ސްވިޑެންގެ ސަރުކާރުން ބުރާސްފަތި ދުވަހު ހާމަކުރި ގޮތުގައި، އެފްރިކާއިން ބޭރުން ފުރަތަމަ ފަހަރަށް މަކުނުވިދުރީގެ ނުރައްކާތެރި ބާވަތް ކަމަށްވާ ކްލޭޑް 1 އެ ގައުމުން ފެނިފައިވާއިރު، މިއީ ގާތުން ގުޅުން ބޭއްވުމުން ފެތުރޭ، އަދި މަކުނުވިދުރީ ބަލީގެ އެންމެ ނުރައްކާތެރި ބާވަތް ކަމަށް ބެލެވޭ ވައިރަސްއެކެވެ.

މިއީ އެފްރިކާއިން ބޭރުން މި ބާވަތުގެ ވައިރަސް ފެނުނު ފުރަތަމަ ފަހަރެވެ.