އެންމެ ބޮޑު އިސްކަމެއް ދިނީ ހުއްޓިފައިހުރި މަޝްރޫއުތައް ކުރިއަށް ގެންދިއުމަށް: މިނިސްޓަރު

މި ސަރުކާރުން ވެރިކަމާއި ހަވާލުވިއިރު ވަރަށް ގިނަ މަޝްރޫއުތަކެއް މަތިކުރެވިފައިވާކަމަށާއި އެންމެ ބޮޑު އިސްކަމެއް ދިނީ ހުއްޓިފައިހުރި މަޝްރޫއުތައް ކުރިއަށް ގެންދިއުމަށްކަމަށް ސްޕޯޓްސް މިނިސްޓަރު އަބްދުﷲ ރާފިއު، ވިދާޅުވެއްޖެއެވެ.

މިނިސްޓަރު ރާފިއު މިހެން ވިދާޅުވީ މިއަދު ރައްޔިތުންގެ މަޖިލީހުގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލަކަށް ޖަވާބު ދެއްވަމުންނެވެ.

މެންބަރު ނާޒިލް ސުވާލުކުރައްވާފައިވަނީ އައްޑޫގައި މީހުން ދިރިއުޅޭ އެއްވެސް ރަށެއްގައި މި ސަރުކާރުން މިހާތަނަށް ކުޅިވަރު ކުރިއެރުވުމުގެ ރޮނގުން އެއްވެސް މަސައްކަތެއް ކުރެވިފައިވޭތޯއެވެ. އަދި ކުރެވުނިއްޔާ ކުރީ ކޮންކަމެއްތޯ އޭނާ ސުވާލުކުރައްވާފައިވެއެވެ.

މި ސުވާލަށް ޖަވާބު ދެއްވަމުން މިނިސްޓަރު ރާފިއު ވިދާޅުވީ މި ސަރުކާރު ފެށުނުއިރު ވަރަށް ބައިވަރު ޕްރޮޖެކްޓްތަކެއް މަތިކުރެވިފައިވާކަމަށެވެ.

"އަޅުގަނޑުމެންގެ ޕްރިއޯރިޓީއަކަށްވީ އެ ފެށިފައިހުރި މަޝްރޫއުތައް ކުރިއަށް ގެންދިއުމަށް ކުރަން ޖެހޭ ކަންކަން ކުރުން" ރާފިއު ވިދާޅުވިއެވެ.

މިނިސްޓަރު ވިދާޅުވިގޮތުގައި ހުއްޓިފައި ހުރި މަޝްރޫއުތަކުގެ މަސައްކަތް އަވަސްކުރުމަށް ކޮންޓްރެކްޓަރުންނަށް ވާހަކަ ދައްކައި އެކަންކަން ކުރިއަށް ގެންދިުއުމާއި ބައެއް ޕްރޮޖެކްޓަށް ނުދެއްކި ހުރި ފައިސާ މި ސަރުކާރުން ދައްކާފައިވާކަމަށެވެ.

މީގެއިތުރުން އައްޑޫ ސިޓީ ހިތަދޫ ސްޓޭޑިއަމް މަރާމާތުކުރުމަކީ މިނިސްޓްރީން އެންމެ އިސްކަންދިން އެއް ކަންތައްކަން ފާހަގަކުރައްވާ މިނިސްޓަރު ރާފިއު ވިދާޅުވީ އެންމެ ފުރަތަމަ ރިޕެޔަރ އެންޑް މެއިންޓެނެންސްގެ ގޮތުގައި ފުރިހަމަ ކުރެވުނު ޕްރޮޖެކްޓަކީވެސް އައްޑޫ ސްޓޭޑިއަމް މަސައްކަތް ނިންމުންކަމަށެވެ. އަދި އެތަނުގައި އިންޓަސްކޫލް އެތްލެޓިކްސް މުބާރާތެއްވެސް ބާއްވާފައިވާކަންވެސް އޭނާ ފާހަގަކުރެއްވިއެވެ.