އިސްރާއީލަށް އިރާނުން ހަމަލާއެއް މިހަފްތާގައި ދީފާނެ: ވައިޓް ހައުސް

އިރާނާއި އެ ގައުމުގެ ސަރަހައްދީ ގުޅުންތަކުން އިސްރާއީލަށް މި ހަފްތާގެ ތެރޭގައި ހަމަލާއެއް ދިނުން އެކަށީގެންވާ ކަމަށް އެމެރިކާގެ ވައިޓް ހައުސްއިން ބުނެފިއެވެ. މިއީ ވޭތުވެދިޔަ މަހު ތެހުރާނުގައި ހަމާސްގެ ސިޔާސީ ލީޑަރު އިސްމާއިލް ހަނިއްޔާ އަވަހާރަކޮށްލުމާ ގުޅިގެން އިރާނުން ދޭން އުޅޭ ޖަވާބަށް އިޝާރާތްކޮށް އެމެރިކާއިން ކުރި ތުހުމަތެއް ކަމަށް ބެލެވެއެވެ.

ނެޝަނަލް ސެކިއުރިޓީ ކައުންސިލްގެ ސްޕޯކްސްޕަރސަން ޖޮން ކާރބީ ވިދާޅުވީ މި ހަމަލާ ދިނުމުގެ ވަގުތާ މެދު އިސްރާއީލުން ކަންބޮޑުވާ މިންވަރަށް އެމެރިކާވެސް ކަންބޮޑުވާ ކަމަށެވެ. އަދި މި ހަފްތާގެ ތެރޭގައި މި ހަމަލާ ދިނުން އެކަށީގެންވާ ކަމަށް އެމެރިކާއިން ދެކޭ ކަމަށެވެ. ނަމަވެސް މި ހަމަލާ އަމާޒުކުރާނީ ކޮން ތަނަކަށްކަން ކަނޑައެޅިގެން ބުނަން ދަތި ކަމަށާއި، ނަމަވެސް "ފާހަގަކޮށްލެވޭ ފަދަ ވަރުގަދަ ހަމަލާތަކެއް" ކަމަށް ވެދާނެ ކަމަށް ކާރބީ ވިދާޅުވިއެވެ.

އިސްރާއީލަށް ދިމާވެދާނެ މިފަދަ ހާލަތެއްގައި އެހީތެރިކަން ފޯރުކޮށްދިނުމުގެ ޤާބިލުކަން އެމެރިކާއަށް ލިބިގެންވާ ކަމަށް ރައީސް ބައިޑެން ޔަގީންކުރައްވާ ކަމަށް ކާރބީ ވިދާޅުވިއެވެ. މި ކަންބޮޑުވުންތަކާ ގުޅިގެން ރައީސް ބައިޑެން އިއްޔެ ހެނދުނު އިނގިރޭސިވިލާތް، ފްރާންސް، ޖަރުމަނުވިލާތް އަދި އިޓަލީގެ ލީޑަރުންނާ ފޯނުންވަނީ ވާހަކަދައްކަވައިފައެވެ.

މި ހާލަތާ ގުޅިގެން އެމެރިކާގެ ޕެންޓަގަނުން ބުނެފައިވަނީ މެދުއިރުމައްޗަށް މިސައިލް ސަބްމެރިނެއް ފޮނުވައި، އެއަރކްރާފްޓް ކެރިއަރ ސްޓްރައިކް ގްރޫޕެއް ސަރަހައްދަށް ފޮނުވުން އަވަސްކުރަން ޑިފެންސް ސެކްރެޓަރީ ލޮއިޑް އޯސްޓިން އަންގަވާފައިވާ ކަމަށެވެ.

ހަނިއްޔާ އަވަހާރަކޮށްލި ކަމަށް ހަމާސްއާއި އިރާނުން އިސްރާއީލަށް ތުހުމަތުކޮށްފައިވާއިރު، އިސްރާއީލުން މި ކަމަށް އެއްވެސް އިންކާރެއް ނުވަތަ އިއުތިރާފެއް ނުވެއެވެ. މީގެ އިތުރުން ލެބަނަންގެ ހިޒްބުﷲގެ ސީނިއަރ ކޮމާންޑަރެއް ކަމަށްވާ ފުއާދު ޝުކުރު ވެސް ބައިރޫތުގެ ދެކުނު ސަރަހައްދަށް އިސްރާއީލުން ދިން އެއަރ ސްޓްރައިކެއްގައި ޖުލައި 30 ގައި ޝަހީދުކޮށްލާފައިވެއެވެ.