އެމެރިކާއިން މެދުއިރުމައްޗަށް ގައިޑެޑް މިސައިލް ސަބްމެރީނެއް ފޮނުވަން ނިންމައިފި

އެމެރިކާއިން މެދުއިރުމައްޗަށް ގައިޑެޑް މިސައިލް ސަބްމެރީނެއް ފޮނުވުމަށް ނިންމާފައިވާކަމަށް އާދިއްތަ ދުވަހު ޕެންޓަގަނުން ބުނެފިއެވެ.

އާދިއްތަ ދުވަހު ޕެންޓަގަނުން ބުނީ މިއީ ޙަމާސްއާއި ހިޒްބުﷲގެ އިސް މެންބަރުން މަރާލުމާ ގުޅިގެން އީރާނާއި އެގައުމުގެ ބައިވެރިންގެ ފަރާތުން އަންނާނެ ކަމަށް ބެލެވޭ ހަމަލާތަކަށް ސަރަހައްދު ތައްޔާރުވުމުގެ ތެރެއިން ކުރާކަމެއްކަމަށެވެ.

ޔޫއެސްއެސް ޖޯޖިއާ، ނިއުކްލިއާ ހަކަތައިން ދުއްވާ ސަބްމެރީނެއް، ޖުލައި މަހު މެޑިޓަރޭނިއަން ކަނޑުގައި އޮތްކަން އެމެރިކާ ސިފައިންގެ ސޯޝަލް މީޑިއާގައި ޕޯސްޓްކޮށްފައިވީ ނަމަވެސް، ސަބްމެރީނެއް ފޮނުވާކަން މިހާ ހާމަކަން ބޮޑު ގޮތެއްގައި އިޢުލާންކުރުމަކީ މަދުން ކުރާ ކަމެކެވެ.

ޕެންޓަގަނުން ނެރުނު ބަޔާނެއްގައި ބުނެފައިވަނީ، އަބްރަހަމް ލިންކަން ސްޓްރައިކް ގްރޫޕް އެ ސަރަހައްދަށް ފޮނުވުން އަވަސްކުރުމަށް އޯސްޓިން އަމުރުކުރައްވާފައި ވާކަމަށެވެ.

އިޒްރޭލް ދިފާއުކުރުމަށް ކުރެވެން އޮތް ހުރިހާ ކަމެއް ކުރުމަށް އެމެރިކާއިން އަޒުމު ކަނޑައަޅާފައިވާކަން ވަޒީރު އޯސްޓިން ތަކުރާރުކޮށް ވިދާޅުވެ، ސަރަހައްދުގައި އިތުރުވަމުންދާ ހަމަނުޖެހުންތަކާ ގުޅިގެން މެދުއިރުމަތީގެ އެކި ސަރަހައްދުތަކުގައި އެމެރިކާ ސިފައިންގެ ބާރާއި ޤާބިލުކަން އިތުރުކުރަމުންދާކަން ބަޔާނުގައި އިތުރަށް ބުނެފައިވެއެވެ.

އިޒްރޭލުގެ ދިފާއީ ބާރު އިތުރުކުރުމަށް އިތުރު ހަނގުރާމަވެރި ޖެޓް މަތިންދާބޯޓުތަކަކާއި ކަނޑުގެ އުޅަނދުތަކެއް މެދުއިރުމައްޗަށް ފޮނުވާނެކަމަށް އެމެރިކާ ސިފައިން ކުރިން ވެސް ބުނެފައިވެއެވެ.

ފަލަސްތީނުގެ މިނިވަންކަމަށް މަސައްކަތްކުރާ ހަމާސްގެ ސިޔާސީ ލީޑަރު އިސްމާޢީލް ހަނިއްޔާ ވަނީ ޖުލައި 31 ވަނަ ދުވަހު އީރާނުގެ ވެރިރަށް ތެހްރާންގައި އަވަހާރަކޮށްލެވިފައެވެ. މި ހަމަލާއާ ގުޅިގެން އީރާނުން ވަނީ އިޒްރޭލަށް ބަދަލުހިފުމުގެ އިންޒާރު ދީފައެވެ. ހަނިއްޔާ އަވަހާރަކޮށްލުމުގެ ޒިންމާ އިޒްރޭލުގެ ބޮލުގައި އީރާނުން އަޅުވާފައިވެއެވެ. އިޒްރޭލުން މިކަމުގެ ޒިންމާ ނަގާފައެއް ނުވެއެވެ.

ހަނިއްޔާ އަވަހާރަކޮށްލުމާއި، ހިޒްބުﷲގެ އިސް ސިފައިންގެ ކޮމާންޑަރު ފުއާދު ޝުކުރު، ބައިރޫތުގައި އިޒްރޭލުން ހިންގި ހަމަލާއެއްގައި އަވަހާރަކޮށްލުމާ ގުޅިގެން ޣައްޒާގެ ހަނގުރާމަ މެދުއިރުމަތީގެ ފުޅާ ހަނގުރާމައަކަށް ބަދަލުވެދާނެކަމުގެ ކަންބޮޑުވުން މިހާރު އުފެދިފައިވެއެވެ.

އިޒްރޭލަށް ދޭ އެހީތެރިކަމުގެ ސަބަބުން ހަނިއްޔާ އަވަހާރަކޮށްލުމުގައި އެމެރިކާ ވެސް ބައިވެރިވެފައިވާކަމަށްބުނެ މިކަމުގެ ޒިންމާ އެމެރިކާއިންވެސް އުފުލަންޖެހޭ ކަމަށް އީރާނުން ބުނެފައިވެއެވެ.

ރޮއިޓާސް ނޫހުން ރިޕޯޓުކޮށްފައިވާ ގޮތުގައި ހުކުރު ދުވަހު ސީރިއާގައި ހިންގުނު ޑްރޯން ހަމަލާއެއްގައި އެމެރިކާގެ އަދި އެހެނިހެން ބައިވެރި ޤައުމުތަކުގެ ގިނަ އަދަދެއްގެ ސިފައިން ޒަޚަމްވެފައިވެއެވެ. މިއީ މެދުއިރުމަތީގައި އިތުރުވަމުންދާ ހަމަނުޖެހުމުގެ ތެރޭގައި، ފަހަކަށްއައިސް އެމެރިކާ ސިފައިންނަށް އަމާޒުކޮށް ދެވަނައަށް ދެވުނު މައިގަނޑު ހަމަލާއެވެ.