މިނިސްޓަރ ފައިސަލް ހެއްކާއެކު ދެއްކެވީ ބައްޕަ، ރައީސް ޔާމީނަށް ކޮށްދެއްވި ޚިދުމަތް

ސިޔާސީ ދާއިރާގައި އަބްދުއްރަޙީމް އަބްދުﷲ ރައީސް ޔާމީންގެ އަރިހުގައި ފާއިތުވީ 20 އަހަރު ވަރުބަލިކަމެއް ފޫހިކަމެއްނެތި ޚިދުމަތް ކޮށްދިންކަން މުޅި ދިވެހި ރާއްޖޭގެ ރައްޔިތުން ހެކިވާނެކަމުގައި އަބްދުއްރަހީމްގެ ދަރިކަލުން އަދި މިސަރުކާރުގެ ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.

ފޭސްބުކްގައި ކުރެއްވި އަސަރުގަދަ ޕޯސްޓެއްގައި ފައިސަލް މިސާލާއެކު ދެއްކެވީ އެމަނިކުފާނުގެ ބައްޕާފުޅު އަބްދުއްރަހީމް ރައީސް ޔާމީނަށް ކުރެއްވި ޚިދުމަތްތަކާއި ރައީސް ޔާމީނަށްޓަކައި ވެވަޑައިގެންނެވި ގުރުބާނީއެވެ.

މިގޮތުން ރައީސް ޔާމީން ސިޔާސީ ހުކުމެއްގައި ޖަލަށް ވަޑައިގެންނެވުމުން ޕީޕީއެމްގެ ބިޔަ ބޮޑު ކޯލިޝަން ހިންގެވުމުގެ ހުރިހާ ކަމެއް ރައީސް ޔާމީން ހަވާލުކުރެއްވީ ބައްޕާފުޅު އަބްދުއްރަޙީމާއިކަން ފާހަގަކުރައްވަމުން ފައިސަލް ވިދާޅުވީ އޭރަކު ބައްޕާފުޅުގެ ތަޢުލީމީ ފެންވަރެއް މުހިއްމުނުވި ކަމަށެވެ. އަދި ރައީސް ޔާމީން ޖަލުން ސަލާމަތްވެވަޑައިގެން ބޭއްވި ޖަލްސާގައި އަބްދުއްރަޙީމަށް ކުރެއްވި ތަޢުރީފާއި ކިޔުއްވި ސަނާގެ މަތީން ފައިސަލް ހަނދާންކޮށްދެއްވިއެވެ. އަދި ފައިސަލްގެ ޕޯސްޓުގައި ރައީސް ޔާމީން އެޖަލްސާގައި އަބްދުއްރަޙީމަށް ތަޢުރީފުކޮށް، އެންމެ ގާތް، އެންމެ އިތުބާރުކުރެވޭ ސިޔާސީ ބައިވެރިޔާކަމަށް ވިދާޅުވެ އަދި އެމަނިކުފާނު ޖަލުގައި ހޭދަކުރެއްވި ދުވަސްވަރު ކުރެއްވި މަސައްކަތަށް ޝުކުރުދަންނަވާ ވީޑިއޯ ހިއްސާކުރެއްވިއެވެ.

ރައީސް ޔާމީންގެ އައު ޕާޓީ، ޕީއެންއެފް އިން ބާއްވަމުން ގެންދަވާ ޖަލްސާތަކުގައި އަބްދުއްރަހީމުގެ ތަޢުލީމީ ފެންވަރެއް ނެތްކަމަށް ވިދާޅުވާ ވިދާޅުވުމަށް ރައްދު ދެއްވަމުން ފައިސަލް ވިދާޅުވީ ރައީސް ޔާމީންގެ ޣައިރު ހާޒިރުގައި ޕީޕީއެމްގެ ބޮޑު ކޯލިޝަން ބަލަހައްޓަވަން ހަވާލުކުރެއްވީ އެއްވެސް ޢިލްމެއް ޙިލްމެއް ނެތް އަބްދުއްރަހީމާއި ކަމަށާއި އޭރު އަބްދުއްރަޙީމުގެ މައްސަލައެއް ނެތްކަމަށެވެ.

މީގެ އިތުރުން 2023 ވަނައަހަރުގެ ރިޔާސީ އިންތިޚާބުގައި ރައީސް ޔާމީނަށް ވާދނުކުރެވޭނެ ގޮތް ހެދީ އެމްޑީޕީން ކަމަށާއި އެއީ 2018 ގެ ރިޔާސީ އިންތިޚާބުގައި ރައީސް ނަޝީދަށް ބައިވެރިވުމުގެ މަގު ރައީސް ޔާމީން އިސްވެ ހުންނަވައި ބަންދުކުރެއްވުމުން އެމްޑީޕީން ބަދަލުހިފުމުގެ ގޮތުން ކުރެއްވި ކަމެއްކަމަށް ފައިސަލް ފާހަގަކުރެއްވިއެވެ. އަދި 2023 ރިޔާސީ އިންތިޚާބު ބޮއިކޮޓް ކުރުމަށް ރައީސް ޔާމީން ނިންމެވީ އަމިއްލަ އެދުމަށް ކަމަށާއި އަމިއްލައަށް ނުލިބުނު މޮޅެއް އެހެން މީހަކަށް ލިބެން ނޭދޭތީ ކަމުގައި ކަމަށްވެސް ފައިސަލްގެ ޕޯސްޓުގައި ވިދާޅުވިއެވެ.

ޕީއެންއެފްގެ އިސްސަފުގައި ތިއްބެވި ބޭފުޅުންނަކީ ކޮންމެ މީހަކީ ރައީސް ޔާމީން މި ދުނިޔެއިން ނައްތާލަން އުޅުނު މީހުންކަމަށްޚުދު ރައީސް ޔާމީންވެސް ކުރިން ވިދާޅުވެފައިވާކަން ފައިސަލް ހަނދާންކޮށްދެއްވިއެވެ. އަދި ފައިސަލްގެ ދެބަފައިންނަށް ތަޢުލީމެއް ލިބިފައި ނެތްކަން ރައީސްޔާމީންއާއި އެމަނިކުފާނުގެ ޕާޓީގެ އިސްބޭފުޅުން އަބަދުހެން ކިޔަމުންދާއިރު، ތަޢުލީމު ލިބިފައި ތިބި ރައީސް ޔާމީންގެ ދަރިން ޤައުމަށް ކޮށްދިން ޚިދުމަތެއް ދެއްކުމަށްވެސް ފައިސަލްގެ ޕޯސްޓުގައި ގޮވާލެއްވިއެވެ.

މިނިސްޓަރ ފައިސަލްއާއި ބައްޕާފުޅު އަބްދުއްރަޙީމަކީ ޕީއެންއެފްގެ ފްރޮންޓް އޮފީސް ޖަލްސާތަކުގައި އެންމެ އަޑު ހަރުކޮށް ވާހަކަދެކެވޭ މަޢުޟޫތަކެވެ.