ޔުކްރެއިންގެ ސުޕަމާކެޓަކަށް ރަޝިއާއިން ދިން ހަމަލާގައި މަރުވި މީހުންގެ އަދަދު 12 އަށް އަރައިފި

ޔުކްރެއިންގެ އިރުމަތީ ސަރަހައްދުގައި ހުރި ކޮސްޓިއަންޓިންކާ ނަމަކަށް ކިޔާ ރަށެއްގައި ހުރި ސުޕަމާކެޓަކާއި ޕޯސްޓް އޮފީހަކަށް ރަޝިއާގެ އާޓިލަރީން ދިން ހަމަލާގައި މަރުވި މީހުންގެ އަދަދު 12 އަށް އަރާފައިވާއިރު، 44 މީހުން ޒަޚަމްވެފައިވާ ކަމަށް ޔުކްރެއިން މިއަދު ބުނެފިއެވެ.

މި ހަމަލާއާ ގުޅިގެން އެމެރިކާގެ ޕެންޓަގަނުން ބުނެފައިވަނީ ރަޝިއާއަށް ޔުކްރެއިންގެ ސިފައިން ވަދެގަތުމަކީ އެމެރިކާއިން ޔުކްރެއިނަށް ދޫކޮށްފައިވާ ހަތިޔާރުތައް ބޭނުންކުރުމުގެ އުސޫލުތަކާ އެއްގޮތަށް ކުރެވޭ ކަމެއް ކަމަށެވެ.

މިއާއެކު، ޔުކްރެއިންގެ ސިފައިން ރަޝިއާގެ ކުރުސްކް ސަރަހައްދަށް ހަމަލާދިނުމާ ގުޅިގެން އެ ސަރަހައްދުގައި ކުއްލި ނުރައްކަލުގެ ހާލަތު އިއުލާނުކޮށްފައިވާ ކަމަށް ރަޝިއާގެ އިމަޖެންސީ މިނިސްޓްރީން ބުނެފައިވެއެވެ. އަދި ޔުކްރެއިންގެ ސިފައިން އެ ސަރަހައްދުގައި ހަރަކާތްތެރިވާތާ ހަތަރު ދުވަސް ވެފައިވާއިރު، އެ ސިފައިންނާ ދެކޮޅަށް ހަނގުރާމަ ކުރަމުންދާ ކަމަށް ރަޝިއާގެ ޑިފެންސް މިނިސްޓްރީން ބުނެފައިވެއެވެ.

މީގެ އިތުރުން، ރަޝިއާގެ ލިޕެޓްސްކް ސަރަހައްދުގައި ހުރި އެއަރފީލްޑަކަށް ޔުކްރެއިނުން ވައިގެ ހަމަލާއެއް ދީފައިވާ ކަމަށްވެސް ރިޕޯޓުތަކުގައި ބުނެފައިވެއެވެ. މި އެއަރފީލްޑަކީ ހަނގުރާމައިގެ ކުރީ ސަފުތަކުން ސަތޭކަ ކިލޯމީޓަރު ދުރުގައި އޮންނަ އެއަރފީލްޑެކެވެ.

ޔުކްރެއިނާއި ރަޝިއާ ދެމެދު ހިނގަމުންދާ ހަނގުރާމައަކީ 2022 ވަނަ އަހަރުގެ ފެބްރުއަރީ މަހުން ފެށިގެން ދެމިގެންދާ ހަނގުރާމައެކެވެ. މި ހަނގުރާމައިގައި ދެ ފަރާތުން ވެސް ގިނަ އަދަދެއްގެ މަދަނީ ރައްޔިތުންނާއި ސިފައިން މަރުވެ، ޒަޚަމްވެފައިވެއެވެ. އަދި ޔުކްރެއިންގެ ގިނަ އަދަދެއްގެ ރައްޔިތުން ގައުމުން ބޭރަށް ހިޖުރަކޮށްފައިވެއެވެ.

މި ހަނގުރާމައިގެ ސަބަބުން ދުނިޔޭގެ އިޤްތިޞާދަށް ވެސް ބޮޑެތި އަސަރުތަކެއް ކުރަމުންދެއެވެ. ބައިނަލްއަޤްވާމީ މުޖުތަމަޢުން މި ހަނގުރާމަ ހުއްޓުވުމަށް ގޮވާލަމުން ދިޔަ ނަމަވެސް، އަދިވެސް ދެ ފަރާތުން ހަމަލާތައް ދެމުން ގެންދެއެވެ.