އަހަރުގެ މިހާތަނަށް 1.2 މިލިއަން ފަތުރުވެރިން!

އަހަރުގެ މިހާތަނަށް ރާއްޖެއަށް 1.2 މިލިއަން ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ހާމަކުރި ތަފާސްހިސާބުތަކުން ދައްކާގޮތުގައި މިއަދަދަކީ މިދިޔަ އަހަރުގެ މިމުއްދަތާ އަޅާބަލާއިރު 10.2 އިންސައްތަ އިތުރުވުމެކެވެ.

މިދިޔަ އަހަރުގެ މިމުއްދަތުގައި ރާއްޖެ ޒިޔާރަތްކޮށްފައިވަނީ 1،108،715 ފަތުރުވެރިންނެވެ.

މިއަހަރު ރާއްޖެއަށް 2 މިލިއަން ފަތުރުވެރިން ގެނައުމަށް ފަތުރުވެރިކަމާބެހޭ ވުޒާރާއިން ކުރަމުންދާ މަސައްކަތްތައް ކާމިޔާބުވާނެކަމުގެ ނިޝާންތައް މިހާރުވަނީ ފެންނަންފަށާފައެވެ. މިގޮތުން ރާއްޖެއަށް ކޮންމެ ދުވަހަކު ވެސް އަންނަ ފަތުރުވެރިންގެ އަދަދުތައް އިތުރުވަމުން އަންނަކަން ފާހަގަކޮށްލެވެއެވެ. މިގޮތުން ދުވާލެއްގެ މައްޗަށް 5،579 ފަތުރުވެރިން އަންނަކަމަށް ދައްްކައެވެ.

މިއަހަރު ރާއްޖެއަށް އެންމެ ގިނައިން ފަތުރުވެރިން އަންނަމުންދަނީ ޗައިނާއިންނެވެ. ކޮވިޑް-19 ގެ ބަލިމަޑުކަމަށްފަހު ޗައިނާއިން އަންނަ ފަތުރުވެރިން މަދުވުމަށްފަހު ޗައިނާއިން ވަނީ ރާއްޖޭގެ މާކެޓްގެ އެއްވަނަ އަނެއްކާވެސް އަތުލާފައެވެ. މިގޮތުން މިއަހަރު ޗައިނާއިން ރާއްޖެއަށް 168،624 ފަތުރުވެރިން ޒިޔާރަތްކޮށްފައިވެއެވެ.