"މަސް އެކްސްޕޯޓުކުރުމަށް ކުދި އަދި މެދުފަންތީގެ ވިޔަފާރިތަކަށް އޮތް ފުރުސަތު ފުޅާ ކުރަން ޖެހޭ"

ރާއްޖެއިން މަސް އެކްސްޕޯޓުކުރާ ފަރާތްތަކުގެ ތެރެއިން ކުދި އަދި މެދުފަންތީގެ ވިޔަފާރިތަކަށް އޮތް ފުރުޞަތު ވަރަށް ހަނިކަމަށް ފިޝަރީޒް މިނިސްޓްރީން ބުނެފިއެވެ.

ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން އެ މިނިސްޓްރީގެ ސްޓޭޓް މިނިސްޓަރު މުޙައްމަދު މުއްޠަލިބް ވިދާޅުވީ މަސްވެރިކަމުގެ ދާއިރާގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކަށް އެ ފުރުސަތު ފަހިކޮށްދިނުމަށް ސަރުކާރު ކުންފުނި މިފްކޯއިން މިހާރު މަގުފަހިކޮށްދެމުން އަންނަކަމަށެވެ.

"އެބޭފުޅުންނަށް ބޭނުންވާ މަސް ހޯދައިދިނުމާއި އެކްސްޕޯޓް ކުރަން ބޭނުންވާ މަސް ޕްރޮސެސްކޮށް ޔުރަޕަށް ބޭރުކުރެވޭނެ ލައިސެންސް އޮތް ބަޔަކު އެކަން ކޮށްދިނުން" މުއްތަލިބު ވިދާޅުވިއެވެ.

އޭނާ ވިދާޅުވީ އެ މަސައްކަތަށް އެ ވިޔަފާތިތައް އަތުން އެކަށީގެންވާ ޗާޖެއް ނަގާކަމަށާއި ނަމަވެސް އެ ޗާޖު ނަގައިގެންވެސް އެކަން ކުރެވޭނެ މަގު ފަހިކޮށްދޭކަމަށެވެ.

މުއްތަލިބު ވިދާޅުވިގޮތުގައި ސަރުކާރުން ބޭނުންވަނީ ވީހާވެސް ގިނަ ބަޔަކަށް މަސްވެރިކަމުގެ ދާއިރާއިން ނަފާ ލިބޭނެ މަގު ފަހުކޮށްދިނުމަށެވެ.

މީގެއިތުރުން ކުދި އަދި މެދު ފަންތީގެ ވިޔަފާރިތައް ކުރި އަރައިގެން ދިއުމަކީ ގައުމުގެ އިގްތިޞާދަށްވެސް ވަރަށް ބޮޑެތި ކުރިއެރުން ލިބިގެންދާނެކަމެއްކަން ފާހަގަކުރައްވާ ސްޓޭޓް މިނިސްޓަރު މުއްތަލިބު ވިދާޅުވީ އެހެންވެ އެކަން ކުރުމަށް ސަރުކާރުން ވަރަށް ބޮޑު އަހައްމިއްޔަތުކަމެއްދޭކަމަށެވެ.