އާއިލީ ގުޅުން ދެމެހެއްޓުމަށްޓަކައި ތިބާގެ މުދަލުން ހޭދަކުރޭ: ޚުތުބާ

އާއިލީ ގުޅުން ދެމެހެއްޓުމަށްޓަކައި ތިމާގެ މުދަލުން ހޭދަކުރުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

މިއަދުގެ ހުކުރު ޚުތުބާގެ މައުޟޫއަކީ "އާއިލީ ގުޅުން ދެމެހެއްޓުން" މިއެވެ.

ޚުތުބާގައި ބުނެފައިވަނީ ތާރީޚީ ގޮތުން ބަލާއިރު އިންސާނިއްޔަތު ދުށް ފުރަތަމަ ޖަމާޢަތަކީ ޢާއިލާކަމަށާއި އެ އާއިލާގެ އުނގަކީ ތުއްތު ކުއްޖާގެ އެންމެ ފުރަތަމަ އަމާންކަމާއި ހިމާޔަތާއި ލޯބި ދިން އުނގުކަމަށެވެ. އަދި އެއީ އިންސާނާގެ ސަހުސިއްޔަތު ބިނާކޮށްދީ ތަހުޒީބު މުވާތިނަކަށް ހަދައިދޭ މަދަރުސާކަމަށްވެސް ޚުތުބާގަިއ ބުނެފައިވެއެވެ.

ޙުތުބާގައި ބުނެފައިވާގޮތުން އާއިލާއަކީ ކުއްޖާ ބޮޑުވެ ދިރިއުޅުމުގެ ހަމަތަކާއި އުސޫލުތަކާއި ސަގާފަތްތަކާއި އާދަކާދަތައް ލިބިގަންނަ މަރުކަޒެވެ.

ހަރުދަނާ މުޖުތަމައެއްގެ އަސާސަކީ އާއިލާތައްކަމަށައި އެހެންވެ އާއިލާއަކީ މުޖުތަމައުގެ ބިންގާކަން ފާހަގަކޮށް ޚުތުބާގައި ބުނެފައިވަނި މި ބިންގާ ވަރުގަދަކުރެވިގެން ނޫނީ މުޖުތަމައު ބާރުވެރިއެއް ނުކުރެވޭނެކަމަށެވެ.

އަދި މިއަދު އިސްލާމީ އުންމަތް ވަނީ ބާރުވެރި ޣީރަތްތެރި މުޖުތަމައަކަށް ނުހަނު ބޭނުންވެފައިކަންވެސް ފާހަގަކޮށްފައިވެއެވެ.

"އާއިލާއެއް ފެށިގެން އަންނަނީ މަތިވެރި ގުޅުމަކުންނެވެ. އެއީ ކާވެނީގެ ބަދަހި ގުޅުމެވެ. އާއިލީ ގުޅުންތަކުގެ ތެރޭގައި ހިމެނެނީ ދެމަފިރީންގެ ގުޅުމާއި ދެމަފިރިން އެކަކު އަނެކަކަށް އަދާކުރާންޖެހޭ ހައްގުތަކާއި ވާޖިބުތަކެވެ. މައިންބަފައިންނާއި ދަރީންނާމެދު އޮންނަ ގުޅުމާއި މައިންބަފައިންގެ ހައްގުތަކާއި ވާޖިބުތަކެވެ. އަދި އެއްބަނޑު އެއްބަފާ ނުވަތަ އެއްބަނޑު ނުވަތަ އެއްބަފާ އަޚުންނާއި އުޚުތުންގެ ގުޅުންތަކާއި އެފަރާތްތަކުގެ ހައްގުތަކާއި ވާޖިބުތަކެވެ. މާމައިންނާއިން ކާފައިންނާއި ބޮޑު ބޭބެއިންނާއި ބޮޑުދައިތައިންނާއި އެމީހުންގެ ދަރީންގެ މެދުގައި އޮންނަން ޖެހޭ ހައްގުތަކާއި ވާޖިބުތަކެވެ. އެހެންކަމުން މި ގުޅުންތައް ބަދަހިކޮށް ބާރުވެރިކުރުވުމަކީ އާއިލާގެ ކޮންމެ ފަރުދަކުމެ އިސްވެ އަދާކުރާންޖެހޭ ވާޖިބެކެވެ." ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނެފައިވަނީ އިންސާނީ ނަސްލު ބަލަހައްޓައި ނެގެހެއްޓޭނީ ފާރަވެރި އޯގާތެރި ކެތްތެރި އާއިލާއެއްގެ ހިޔާވަހިކަން ލިބިގެންކަމަށާއި އިސްލާމްދީނުގައި އިންސާނީ ނަސްލަށް ވަރަށް ބޮޑު އަހައްމިއްޔަތުތަކަމެއް ދީފައިވާކަމަށެވެ. އަދި މާތް ﷲ ވަނީ ހުރިހައި ނަސްލުތަކުގެ މައްޗަށް އިންސާނީ ނަސްލު މާތްކުރައްވާ މަތިވެރިކުރައްވާފައިކަމަށްވެސް ޚުތުބާގައި ބުނެފައިވެއެވެ.

"އާއިލާގެ ތެރޭގައި ތައުލީމާއި ނަފްސުގެ ކުރިއެރުމަށް ހިތްވަރުދީ ހުނަރާއި އިލްމު ތަރައްގީކުރުމަށް ހޭދަކުރުމަކީ ދިރިއުޅުމުގެ ކާމިޔާބީއަށް ވާސިލްވާން އެހީތެރިވެދޭ ބާރެއްކަން އާއިލާގެ ކޮންމެ މެންބަރަކަށް ޅަފަތުން ފެށިގެން ވިސްނައިދޭން ޖެހެއެވެ. އާއިލާގެ ތަނަވަސްކަން ހުންނަ ފަރާތްތަކުން އުފަލާއެކު އެ ޒިންމާ ނެގުމަކީ ދިރިއުޅުމުގެ އަސާސަކަށް ހަދަން ޖެހެއެވެ." ޚުތުބާގައި ބުނެފައިވެއެވެ.

މީގެއިތުރުން ތިމާއަށް މާތް ﷲ ދެއްވާ މުދަލާއި ތަނަވަސްކަމަކީ ހަމައެކަނި ތިމާގެ މިލްކެއް ނޫންކަން ފާހަގަކޮށް ޚުތުބާގައި ބުނެފައިވަނީ އެ މުދަލަކީ އޭގައި އެތައް ބައެއްގެ ހައްގުތައް އެކުލެވޭ އެއްޗެއްކަމަށެވެ. އެހެންވެ އާއިލީ ގުޅުން ދެމެހެއްޓުމަށްޓަކައި އެއިން ހޭދަކުރުމަށް ޚުތުބާގައި ބުނެފައިވެއެވެ. އަދި ދުނިޔޭގެ ބާއްޖަވެރި ހަޔާތެއް ހޭދަކުރުމުން އެމީހުން މަހްރޫމް ނުކުރުމަށްވެސް ގޮވާލާފައިވެއެވެ.