ޓްރަމްޕާއި ހެރިސްގެ ފުރަތަމަ ރިޔާސީ ބަހުސް ސެޕްޓެމްބަރުގައި

ޑޮނަލްޑް ޓްރަމްޕާއި ކަމަލާ ހެރިސްގެ މެދުގައި ބޭއްވޭ ފުރަތަމަ ރިޔާސީ ބަހުސް ސެޕްޓެމްބަރު 10 ވަނަ ދުވަހު ބާއްވާ ގޮތަށް ހަމަޖެހިއްޖެކަމަށް އޭބީސީ ނިއުސްއިން ބުނެފިއެވެ. މި ބަހުސް ބާއްވާނެކަން އެ ނެޓްވޯކުން ކަށަވަރުކޮށްދިނީ އެކްސް ގައި ކުރި ޕޯސްޓެއްގައެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ވަނީ ނޮވެމްބަރުގެ އިންތިޚާބުގެ ކުރިން ހެރިސްއާއެކު އެތައް ފަހަރެއްގެ މަތިން ބަހުސް ކުރުމަށް ތައްޔާރަށް ހުރިކަމަށް ބުނެފައެވެ. އޭނާ ބުނި ގޮތުގައި ޖުމްލަ 3 ބަހުސް ބާއްވަން ޖެހޭނެއެވެ. އިތުރު 2 ބަހުސް ފޮކްސް ނިއުސްއާއި އެންބީސީން ހޯސްޓްކުރަންވެސް އޭނާ ހުށަހެޅިއެވެ.

މިޝިގަންގެ ޑެޓްރޮއިޓްގައި ބޭއްވުނު ހަރަކާތެއްގައި ހެރިސް ވަނީ އޭބީސީގެ ބަހުސަށް ހާޒިރުވާނެކަން ކަށަވަރުކޮށްދީފައެވެ. "ޑޮނަލްޑް ޓްރަމްޕާއެކު ޑިބޭޓްކުރުމަށް އަޅުގަނޑު ވަރަށް ބޮޑަށް އުފާކުރަން. ސެޕްޓެމްބަރު 10 ގައި އެކަން ކުރެވޭނެ. އަޅުގަނޑަށް އަޑުއިވުނު ގޮތުގައި އޭނާވެސް އެކަމަށް އެއްބަސްވެއްޖެ،" ހެރިސް ވިދާޅުވިއެވެ. ނަމަވެސް އިތުރު ބަހުސްތަކާ ގުޅޭގޮތުން އޭނާ އަދި އެއްޗެއް ބުނެފައެއް ނުވެއެވެ.

ޓްރަމްޕް ވަނީ ޖޫންމަހު ރައީސް ޖޯ ބައިޑަންއާ އެކުވެސް އެއްފަހަރު ބަހުސް ކޮށްފައެވެ. ދެބޭފުޅުން އަނެއްކާވެސް ސެޕްޓެމްބަރު 10 ގައި ބަހުސްކުރަން ހަމަޖެހިފައިވީ ނަމަވެސް، ފުރަތަމަ ޑިބޭޓްގައި ޓްރަމްޕާ ކުރިމަތިލުމުގައި ބައިޑަންގެ ފެންވަރު ދަށްވުމާ ގުޅިގެން އޭނާ ވަނީ އިންތިޚާބުން ތަނާޒުލުވެފައެވެ.

ފާއިތުވި ހަފްތާގައި ޓްރަމްޕާއި ހެރިސްގެ މެދުގައި ފުރަތަމަ ބަހުސް ބާއްވާނެ ތަނަކާއި ވަގުތަކާ މެދު ދެބަސްވުންތަކެއް ވެސް އުފެދުނެވެ. ކުރިން ޓރަމްޕް ވަނީ ކޮންޒަވޭޓިވް ނެޓްވޯކް ފޮކްސް ނިއުސްއިން ބަހުސް ހޯސްޓްކުރަން ބޭނުންވާކަމަށް ބުނެފައެވެ. އަދި އެ ބަހުސް ބާއްވާނީ ޕެންސިލްވޭނިއާގައި "ކަނޑައެޅޭ ސަރަޙައްދެއްގައި" ކަމަށްވެސް އޭނާ ބުނެފައިވެއެވެ.

ޤައުމީ ފެންވަރުގައާއި ވާދަވެރި ސްޓޭޓްތަކުގައި ކުރިޔަށްދިޔަ ޚިޔާލު ހޯދުންތަކުން ދައްކާ ގޮތުގައި، ހެރިސްގެ ކެމްޕޭން ފެށުނީއްސުރެ ޓްރަމްޕާ އަޅާބަލާއިރު އޭނާއަށް ކޮންމެވެސް ވަރަކަށް ކުރިއެރުން ލިބިފައިވެއެވެ. ނަމަވެސް މި ވާދަވެރި ރޭހުގައި ދެ ކެންޑިޑޭޓުން ދަނީ ވަރަށް ގާތުން ވާދަކުރަމުންނެވެ.