އިނގިރޭސިވިލާތުގެ ހަމަނުޖެހުންތަކުގައި 480 އަށްވުރެ ގިނަމީހުން ހައްޔަރުކޮށްފި

އިނގިރޭސިވިލާތުގެ އެކި ކަންކޮޅުތަކުގައި މިހާރު ހިނގަމުންދާ ހަރުކަށި ފިކުރުގެ ހަމަނުޖެހުންތަކުގައި މިހާތަނަށް 480 އަށްވުރެ ގިނަމީހުން ހައްޔަރުކޮށް 149 މީހެއްގެ މައްޗަށް ދައުވާ އުފުލައިފިއެވެ.

އިނގިރޭސިވިލާތުގެ ނޭޝަނަލް ޕޮލިސް ޗީފްސް ކައުންސިލް (އެންޕީސީސީ) އިން ބުރާސްފަތި ދުވަހު ބުނީ ޖުލައި މަހުގެ 30 ވަނަ ދުވަހުން ފެށިގެން އިނގިރޭސިވިލާތުގެ އެކި ސަރަހައްދުތަކުގައި ހައްދުފަހަނައަޅާފައިވާ ހަމަނުޖެހުންތަކާއި ގުޅިގެން މިހާތަނަށް 483 މީހަކު ހައްޔަރުކޮށްފައިވާ ކަމަށާއި 149 މީހެއްގެ މައްޗަށް ދައުވާ އުފުލާފައިވާ ކަމަށެވެ.

އެންޕީސީސީއިން ނެރުނު ބަޔާނެއްގައި ބުނީ ޖިނާއީ އަދުލުގެ ނިޒާމުގެ ތެރެއިން މައްސަލަތައް ހަލުވިކަމާއެކު ކުރިއަށް ގެންގޮސްފައިވާތީ، ގިނަ ކުށްވެރިންގެ މައްޗަށް ދައުވާއުފުލައި އަޑުއެހުންތައް ކުރިއަށް ގެންގޮސް މިހާރުވެސް އެތައް ބަޔަކަށް ހުކުމް ކޮށްފައިވާ ކަމަށެވެ.

ބުދަ ދުވަހުގެ ރޭ އެގައުމުގެ އެކި ކަންކޮޅުތަކުގައި އެތައް ހާސް ފުލުހުން ނިކުމެ، 36 އެއްވުމެއް ރޫޅާލައިފައި ވަނީ "މިނިމަލް ޑިސްއޯޑާ އާއި މަދު ބަޔަކު ހައްޔަރުކޮށްގެން" ކަމަށް އެ ބަޔާނުގައި ބުނެފައިވެއެވެ.

"މިހާތަނަށް ގާތްގަނޑަކަށް 104 އޮފިސަރަކަށް އެކިވަރުގެ އަނިޔާ ލިބިފައިވާ އިރު، ގިނަ އަދަދެއްގެ އޮފިސަރުންނަށް ލިބުނު އަނިޔާގެ ސަބަބުން ހޮސްޕިޓަލުގައި އެޑްމިޓް ކޮށްފައި ވޭ،" އެ ބަޔާނުގައި ވެއެވެ.

އެންއޯސީސީގެ ޗެއާ ޗީފް ކޮންސްޓަބަލް ގެވިން ސްޓެފަންސް ވިދާޅުވީ މި މައްސަލައާ ގުޅިގެން ހައްޔަރުކޮށް ދައުވާ ކުރާ މީހުންގެ އަދަދު އެތައް ސަތޭކައަކަށް އަރާތީ ފުލުހުންގެ ފިޔަވަޅު "ފުލް ސްޕީޑްގައި" ކުރިއަށްދާ ކަމަށެވެ.

ޑިރެކްޓާ އޮފް ޕަބްލިކް ޕްރޮސެކިއުޝަންސް ސްޓެފަން ޕާކިންސަން ވިދާޅުވި ގޮތުގައި މިހާރުވެސް އިތުރު ދައުވާތަކަށް ބާރު ދީ، ޖަލުގެ ބޮޑެތި ހުކުމްތައް އިއްވަމުން އަންނަ ކަމަށާއި ގައުމަށް ވަރަށް އުނދަގޫ ދުވަސްތަކަކަށް ފަހު ވެސް އިންސާފު ލިބެމުން އަންނަ ކަމަށެވެ.

ހަރުކަށި ފިކުރުގެ މީހުން މުސްލިމުންނަށާއި މައިނޯރިޓީ ޖަމާއަތްތަކަށާއި ހިޖުރަވެރިންނަށް އަމާޒުކޮށް ނަސްލީ އަދި އިސްލާމް ދީނަށް ފުރައްސާރަކުރާތީ އިނގިރޭސިވިލާތުގައި ވަނީ ހަމަނުޖެހުން އުފެދިފައެވެ.

މި ހަމަނުޖެހުންތައް އިތުރަށް ފުޅާވެގެން ދިޔައީ މިދިޔަ ޖުލައި މަހުގެ 29 ވަނަ ދުވަހު ސައުތުޕޯޓްގައި ތިން ކުއްޖަކަށް ވަޅިން ހަމަލާދިން މައްސަލާގައި ހައްޔަރުކުރި މީހާއަކީ މުސްލިމުންގެ ހިމާޔަތް ހޯދަމުން ދިޔަ މީހެއް ކަމަށް ބުނެ އޮންލައިންކޮށް ފެތުރުނު ދޮގު ވާހަކަތަކުންނެވެ.

ހަމަލާ ދިން މީހާއަކީ ވޭލްސްގެ ކާޑިފަށް އުފަން އުމުރުން 17 އަހަރުގެ އެކްސެލް ރުޑަކުބާނާ ކަމަށް ކަމާބެހޭ ފަރާތްތަކުން ވަނީ ފާހަގަކޮށްފައެވެ.