ޕޫޓިން ހައްޔަރުކޮށްދިނުމަށް ޔޫކްރެއިނުން މެކްސިކޯގައި އެދިއްޖެ

ރަޝިޔާގެ ރައީސް ޕުޓިން އެ ޤައުމަށް ޒިޔާރަތްކޮށްފިނަމަ ހައްޔަރުކުރުމަށް ޔުކްރެއިނުން މެކްސިކޯގައި އެދިއްޖެއެވެ.

ޕޫޓިން ހައްޔަރުކޮށްދިނުމަށް ޔޫކްރެއިނުން އެދިފައި މިވަނީ މެކްސިކޯގެ އައު ރައީސްގެ ހުވާކުރުމުގެ ރަސްމިއްޔާތަށް ރަޝިޔާގެ ރައީސް ވްލަޑިމިއަރ ޕުޓިން އަށް ދަޢުވަތު ދީފައިވާ ކަމަށް މީޑިއާތަކުން ރިޕޯޓުކުރުމާ ގުޅިގެންނެވެ.

މެކްސިކޯގައި ހުންނަ ޔުކްރެއިންގެ އެމްބަސީން ބުދަ ދުވަހު އެކްސް ޕްލެޓްފޯމްގައި ބުނެފައިވަނީ، ބައިނަލްއަޤްވާމީ ހައްޔަރު ކުރުމުގެ އަމުރާ އެއްގޮތަށް ޢަމަލުކޮށް، ނެދަލޭންޑްސްގެ ވެރިރަށް ހޭގްގައި ހުންނަ އދ. ގެ ޝަރުޢީ އިދާރާއަށް ޕުޓިން ހަވާލުކުރާނެ ކަމަށް ޔަޤީން ކުރާކަމަށެވެ. މެކްސިކޯ ސަރުކާރުން އެކަން ކުރާނެކަމާމެދު ޝައްކު ނުކުރައްވާ ކަމަށްވެސް އޭނާ ވިދާޅުވިއެވެ.

މީގެ ކުރިން މޮސްކޯގައި ހުންނަ މެކްސިކޯގެ އެމްބަސީން ރަޝިޔާގެ ނޫހެއް ކަމަށްވާ އިޒްވެސްޓިޔާ އަށް ކަށަވަރުކޮށްދީފައިވަނީ، އޮކްޓޯބަރު 1 ވަނަ ދުވަހު ބޭއްވުމަށް ހަމަޖެހިފައިވާ މެކްސިކޯގެ އައު ރައީސް ކްލޯޑިއާ ޝެއިންބާމްގެ ހުވާކުރުމުގެ ރަސްމިއްޔާތަށް ޕުޓިން އަށް ދަޢުވަތު ދީފައިވާ ކަމަށެވެ.

ނަމަވެސް އެ ރަސްމިއްޔާތުގައި ބައިވެރިވާނީ ޕުޓިން އަމިއްލަފުޅަށްތޯ ނުވަތަ އެހެން ބޭފުޅަކު ފޮނުވާނީތޯ އަދި ނިންމާފައި ނުވާ ކަމަށް އެމްބަސީން ބުނެފައިވެއެވެ.

ޔުކްރެއިންގެ އެމްބަސީން އިތުރަށް ބުނެފައިވަނީ، މެކްސިކޯގެ ސަރުކާރުން ޑިޕްލޮމެޓިކް ގުޅުން އޮންނަ ހުރިހާ ޤައުމުތަކަކަށް ދަޢުވަތު ދޭކަން އެނގޭ ކަމަށާއި، ޔުކްރެއިންގެ ރައީސް ވޮލޮޑިމިރް ޒެލެންސްކީއަށްވެސް ދަޢުވަތު ދީފައިވާތީ އެކަން އަގުވަޒަންކުރާ ކަމަށެވެ.

ޔޫކްރެއިންގެ އެމްބަސީން ހަނދާންކޮށްދީފައިވަނީ، ޔުކްރެއިންގެ ކުޑަކުދިން ރަޝިޔާއަށް ވަގަށް ގެންދިއުމުގެ ކުށުގައި ބައިނަލްއަޤްވާމީ ޖިނާއީ ކޯޓުން ޕުޓިން ހައްޔަރުކުރުމުގެ އަމުރެއް ނެރެފައިވާ ކަމަށެވެ.

"މި ލަދުވެތި ކުށަކީ، ޔުކްރެއިނަށް ބޮޑު ސްކޭލެއްގައި ހަމަލާ ދިނުމަށް ނިންމުމާ ގުޅިގެން، ޕުޓިން އާއި ރަޝިޔާގެ އެހެން އަސްކަރީ އަދި ސިޔާސީ ލީޑަރުން އެއް ދުވަހަކުން ޝަރީޢަތުގެ ކުރިމައްޗަށް ގެންނަން ޖެހޭނެ ގިނަ ސަބަބުތަކުގެ ތެރެއިން އެއް ސަބަބު," ޔުކްރެއިންގެ އެމްބަސީން ބުނެފައިވެއެވެ.