އެދެނީ ބަންގްލަދޭޝް އަށް އެއްބައިވަންތަ ކަމާއި ހަމަޖެހުން ލިބުން- ރައީސް

އެދެނީ ބަންގްލަދޭޝް އަށް އެއްބައިވަންތަކަމާއި ހަމަޖެހުން ލިބުން ކަމަށް ރާއްޖޭގެ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ޑރ. މުޙައްމަދު ޔޫނުސްއަށް ތަހުނިޔާ ވިދާޅުވެ އެކްސްގައި ކުރެއްވި ޕޯސްޓުގައެވެ. އެ ޕޯސްޓުގައި ރައީސް ވިދާޅުވީ ބަންގްލަދޭޝްގެ ވަގުތީ ސަރުކާރުގެ އިސް ލަފާދޭ ފަރާތުގެ މަޤާމަށް ޑރ. މުޙައްމަދު ޔޫނުސް އައްޔަންކުރެއްވުމާ ގުޅިގެން އެމަނިކުފާނަށް ހޫނު މަރުޙަބާއާއި ތަހުނިޔާ ދަންނަވާކަމަށެވެ.

ދިގު މުއްދަތެއްގެ ރަޙްމަތްތެރިއެއްގެ ހައިސިއްޔަތުންނާއި ގާތް ބައިވެރިއެއްގެ ގޮތުން ދިވެހިރާއްޖެއިން އެދެނީ ޑރ. މުޙައްމަދު ޔޫނުސް ގެ ލީޑަރޝިޕްގެ ދަށުން ބަންގްލަދޭޝްގެ ރައްޔިތުންނަށް އެއްބައިވަންތަކަމާއި، ސުލްޙަވެރިކަމާއި، ފާގަތިކަން ލިބުމަށް ކަމަށް ވެސް ރައީސްގެ ޕޯސްޓުގައި ވިދާޅުވެފައިވެއެވެ

ޑރ. މުޙައްމަދު ޔޫނުސް ބަންގްލަދޭޝްގައި އެކުލަވާލާފައިވާ ސަރުކާރުގެ އިސް ލަފާދޭ މަޤާމަށް އައްޔަންކުރައްވާފައިވަނީ އެގައުމުގައި ހިނގަމުންދާ މުޒާހަރާތަކާ ގުޅިގެން ޕްރެޝަރު ބޮޑުވެ، އިސްތިއުފާ ދެއްވައި، ބޮޑު ވަޒީރު ޝައިޚް ހަސީނާ ގައުމު ދޫކުރައްވައި ފިއްލަވައިވަޑައިގަތުމާއިގުޅިގެންނެވެ.

ޑރ. މުޙައްމަދު ޔޫނުސް އަކީ ނޮބެލް ސުލްހައިގެ އިނާމު ލިބިވަޑައިގަންނަވާފައިވާ ބޭފުޅެކެވެ. މި އިނާމު ޔޫނުސް އާއި އޭނާގެ ގްރަމީން ބޭންކަށް ލިބިވަޑައިގަންނަވާފައިވަނީ ންގްލަދޭޝްގެ ފަގީރު ހިސާބުތަކުގެ މީހުންނަށް ކުދި ލޯނު ދީގެން އެ މީހުން ފަގީރުކަމުން ސަލާމަތް ކުރުމަށް ކޮށްފައިވާ މަސައްކަތްތަކަށެވެ.