ވޯލްޑް ސެންޓްރަލް ކިޗަންގެ މުވައްޒަފަކު ޣައްޒާގައި ޝަހީދުކޮށްލައިފި

އެމެރިކާގެ އެހީދޭ ޖަމާއަތެއް ކަމަށްވާ ވޯލްޑް ސެންޓްރަލް ކިޗަން (ޑަބްލިއުސީކޭ) ގެ މުވައްޒަފަކު ޣައްޒާގައި އިސްރާއީލުން ޝަހީދުކޮށްލައިފިއެވެ.

އޭނާ މަރުވި ގޮތުގެ ތަފްސީލެއް ނުދީ ޑަބްލިއުސީކޭއިން ނެރުނު ބަޔާނެއްގައި ބުނީ ފަލަސްތީނުގެ ރައްޔިތެއް ކަމަށްވާ ނާދީ ސަލްއައުޓް މަރާލާފައިވަނީ މެދުތެރޭގެ ސިޓީއެއް ކަމަށްވާ ދީރް އަލް ބަލާހް ކައިރީގައި ކަމަށެވެ.

ޑަބްލިއުސީކޭއިން ބުނީ އޭނާއަކީ ރަފާގައި އެޖަމިއްޔާއިން ދިން އިޖާބަގެ އެންމެ ކުރީ ކޮޅުން ފެށިގެން އެޖަމިއްޔާގެ ވެއާހައުސް ޓީމްގެ މުހިންމު މެމްބަރެއް ކަމަށާއި އޭނާގެ މައިގަނޑު އަސާސަކީ އިންސާނިއްޔަތަށް އެހީވުން ކަމަށެވެ.

މި ހިތާމަވެރި ހަމަލާގެ ތަފްސީލް އަދިވެސް ބަލަމުން އަންނަ ކަމަށާއި ހަމަލާ ދިންއިރު އޭނާ ހުރީ ޑިއުޓީން ބޭރުގައި ކަމަށް ބެލެވޭ ކަމަށް ވެސް އެ ބަޔާނުގައި ވެ އެވެ.

އޭޕްރީލް މަހުގެ އެއްވަނަ ދުވަހު އިސްރާއީލުން ދިން ވައިގެ ހަމަލާއެއްގައި އެ ޖަމާއަތުގެ އެހީދޭ ހަތް މީހަކު ވަނީ މަރުވެފަ އެވެ. އިނގިރޭސިވިލާތުގެ ތިން މީހަކާއި އޮސްޓްރޭލިއާ މީހަކާއި ޕޮލެންޑްގެ މީހަކާއި އެމެރިކާ-ކެނެޑާގެ ދެ ވަނަ ރައްޔިތެއްގެ އިތުރުން ފަލަސްތީނު މީހެކެވެ.

މި މަރުތަކާއި ގުޅިގެން ދުނިޔޭގެ އެކި ކަންކޮޅުތަކުން ޖަވާބުދާރީވުމަށް ގޮވާލާފައިވާއިރު، އެ ހަމަލާއަކީ އޮޅިގެންދެވުނު ހަމަލާއެއްކަމަށް އިސްރާއީލުން ބުނުމާއެކު ޑަބްލިއުސީކޭގެ ބާނީ ހޯސޭ އަންދްރޭސް ފަދަ ގިނަ ބަޔަކު ވަނީ އެ "އޮޅުވާލުމުގެ އަމަލެއް" ކަމަށް ބުނެ އިސްރާއީލްގެ ބަހަނާއަށް ރައްދުދީފައެވެ.

އޭޕްރީލް މަހުގެ ފަހުކޮޅު ޑަބްލިއުސީކޭގެ ޗީފް އެގްޒެކެޓިވް އޮފިސަރު އެރިން ގޯރް ވިދާޅުވީ ޣައްޒާގެ އިންސާނީ ހާލަތު އަދިވެސް ވަރަށް ގޯސް ކަމަށާއި އެ ގައުމުގެ އެހީގެ އޮޕަރޭޝަންތައް އަލުން ފަށަން ނިންމީ "ހަކަތައާއި ކަރާމާތާއި އެކު އަދި ވީހާވެސް ގިނަ ބަޔަކަށް ކާންދިނުމަށް ސަމާލުކަން ދީގެން" ކަމަށެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަދުވަހުން ފެށިގެން އިސްރާއީލުން ދެމުންގެންދާ ހަމަލާތަކުގައި މިހާތަނަށް ފަލަސްތީނުގެ 39،600 އަށް ވުރެ ގިނަ މީހުން ޝަހީދުވެފައިވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި ގާތްގަނޑަކަށް 91،400 މީހުން ޒަހަމްވެފައިވާ ކަމަށް އެ ގައުމުގެ ސިއްހީ އިދާރާތަކުން ބުނެ އެވެ.

އިސްރާއީލު ހަނގުރާމައަށް 10 މަހަށްވުރެ ގިނަ ދުވަސް ވެފައިވާއިރު، ޣައްޒާގެ ބޮޑު ބަޔަކުން ކާބޯތަކެއްޗާއި ސާފު ފެނާއި ބޭސް ލިބުން ހުއްޓުމަކަށް އައިސްފައެވެ.