މާލޭ ގެއެއްގެ ފާޚާނާ ތެރޭގައި ފެންވަރަން ހުރި މީހަކު ނެރެ ވަޅިން ބިރުދައްކައި ފޭރުމަށްފަހު، ވަޅިން ހަމަލާ ދިނުމުގެ ކުށުގައި މީހަކު 7 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.
ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ކުށް ސާބިތުވާކަމަށް ކަނޑައަޅައި 7 އަހަރަށް ޖަލަށް ލުމަށް ހުކުމް ކުރެވުނީ މ. ގޯލްޑަންލީފް އަޙްމަދު ނަބީލްގެ މައްޗަށެވެ.
ކްރިމިނަލް ކޯޓުގެ ހުކުމުން އެނގޭ ގޮތުގައި ނަބީލް ތޫނު އެއްޗަކުން ހަމަލާދީފައިވަނީ ގ. އަރުތަވިލާ ގޭގެ ކޮޓަރިއެއްގެ ފާޚާނާގައި ފެންވަރަންހުރި ރ. ރަސްގެތީމު އިރުދޭމާގޭ އަހުމަދު ވިޝާމް އަށެވެ. 2023 ވަނަ އަހަރުގެ އޯގަސްޓް މަހުގެ 16 ވަނަ ދުވަހު ނަބީލް އާއި އިތުރު 2 މީހެއްގެ ބައިވެރިވުމާއެކު ވިޝާމް ފާޚާނައިން ނެރެ، އޭނާގެ ކަރުގައި އަޅާފައި އޮތް 2 ފަށާއި އަތުގައި އަޅާފައި އޮތް ކެވެލި ކޮޅެއްގެ އިތުރުން އަތުކުރީ ގަޑި ފޭރުމަށް ފަހު ވިޝާމްގެ ނިއްކުރިއަށާއި ބުރަކައްޓަށް ނަބީލް ވަޅިން ހަމަލާދީފައިވާކަމަށް ޕީޖީން ވަނީ ކޯޓުގައި ފާހަގަކޮށްފައެވެ.
މިމައްސަލަ ނަބީލްގެ މައްޗަށް ސާބިތުކުރުމުގައި އެންމެ ބޮޑަށް ކޯޓުން ރިޢާޔަތްކޮށްފައިވަނީ ދައުލަތުން ހުށަހެޅި ސިއްރު ހެކިވެރިއެއްގެ ހެކިބަހެވެ.
ބިރުދެއްކުމާއި ނުރައްކާތެރި ހަތިޔާރު ގެންގުޅުމުގެ ޤާނޫނުގެ ދަށުން ނަބީލްއަށް ދަޢުވާކުރެވުނުއިރު މިކުށުގެ އަދަބެއްކަމަށް ޤާނޫނުގައި ކަނޑައަޅާފައިވަނީ 7 އަހަރާއި 10 އަހަރާއި ދެމެދުގެ މުއްދަތެކެވެ. އަދަބު ވީހާވެސް ލުއިކޮށްދިނުމަށް ނަބީލްގެ އެދުމުން މައްސަލަ ބެއްލެވި ޤާޒީ އިސްމާޢީލް ޝަފީޢު ވަނީ ނަބީލްގެ އެ އެދުމަށް ރިޢާޔަތްކޮށް 7 އަހަރަށް ޖަލަށް ލުމަށް ހުކުމް ކޮށްފައެވެ.
ތިލަފުށީ ލޭންޑް ފިލް ފުރި، ކުނި ގެންދަން އެހެން ސަރަހައްދެއް ހަމަޖައްސަނީ
މިއަދުގެ ދެވަނަ އެކްސިޑެންޓު: ދެ މީހަކަށް ފަރުވާ ދެނީ
އިންޑިއާއިން ހިތަދޫ ޕޯޓަށް 300 މެޓްރިކް ޓަނުގެ ކާގޯ
ގާނޫނު މުގުރަން މި ސަރުކާރުން ފުރުސަތެއް ނުދޭނެ: ނައިބު ރައީސް
