ޖިންސީ ގޯނާގެ މައްސަލަތައް އެންމެ ގިނައީ މިދިޔަ މަހު

މިއަހަރު ފުލުހުންނަށް ރިޕޯޓު ކޮށްފައިވާ މައްސަލަ ތަކުގެ ތެރެއިން ޖިންސީ ގޯނާގެ މައްސަލަތައް އެންމެ ގިނައީ މިދިޔަމަހު ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

އެގޮތުން މިދިޔަ މަހު ޖިންސީ ކުށުގެ 35 މައްސަލައެއް ފުލުހުންނަށް ރިޕޯޓުކުރެވިފައިވާކަމަށް ފުލުހުންގެ ތަފާސް ހިސާބުތަކުން ދައްކައެވެ. މިއަދަދަކީ ޖޫން މަހާއި އަޅާބަލާއި 12 ކޭސްގެ އިތުރުވުމެކެވެ. އަދި، މޭ މަހަކީ 18 ކޭސްއާއެކު ޖިންސީ ކުށުގެ މައްސަލަތައް އެންމެ މަދު މަސްކަމުގައި ވީއިރު، މިދިޔަ މަހާއި ގާތްކުރާ އަދަދަކަށް ޖިންސީ ގޯނާގެ މައްސަލަތަށް ރިޕޯޓުކުރެވިފައިވަނީ އޭޕްރިލް މަހެވެ. އެއީ 33 މައްސަލައެވެ.

މިދިޔަ މަހަކީ ފުލުހުންނަށް ރިޕޯޓުކުރެވިފައިވާ ޖިންސީ ކުށުގެ މައްސަލަތައް އިތުރުވެފައިވާ މަހެއްނަމަވެސް، ރާއްޖޭގައި އެންމެ އާންމު ކުށްތައް ކަމުގައިވާ ވައްކަމާއި ޓްރެފިކް އެކްސިޑެންޓުތައް ދަށްވެފައިވާކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ. އެގޮތުން، ޖޫން މަހާއި އަޅާބަލާއިރު ޖުލައި މަހު ފުލުހުންނަށް ރިޕޯޓުކުރެވިފައިވާ ވައްކަމުގެ މައްސަލަތައް 3 ކޭސް ދަށްވި އިރު، ޓްރެފިކް އެކްސިޑެންޓުތަކުގެ އަދަދު 8 ކޭހުން ދަށްވެފައިވެއެވެ.