ބިދޭސީންގެ ކެފޭތަކެއް ރެއިޑްކޮށް ހަތަރު ބިދޭސީން ހައްޔަރުކޮށްފި

ބިދޭސީން ހިންގާ ކޮފީ/ޓޭކްއަވޭ ކެފޭތަކެއް ރެއިޑްކޮށް ހަތަރު ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މިކަން ހާމަކޮށް އިމިގްރޭޝަން އިން އެކްސްގައި ޕޯސްޓެއް ކޮށްފައިވެއެވެ. އެ ޕޯސްޓުގައި އިމިގްރޭޝަން އިން ބުނެފައިވަނީ ހުޅުމާލޭގައި ބިދޭސީން ހިންގަމުންދާ ކޮފީ/ޓޭކްއަވޭ ފިހާރަތަކަށް ހާއްސަކޮށް ރެއިޑެއް ހިންގާފައިވާ ކަމަށާއި މި ރެއިޑް ކުރިއަށް ގެންގޮސްފައިވަނީ ހުޅުމާލޭގައި ކަމަށެވެ.

މި ރެއިޑްގައި އިއްޔެ 7 ތަނެއް ބަލައި ފާސްކޮށްފައިވާ ކަމަށާއި މި ތަންތަނުގައި ގަވާއިދާ ހިލާފަށް މަސައްކަތްކުރަމުންދިއަ 04 ބިދޭސީއެއް ވަނީ އިމިގްރޭޝަން ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަން އިން ހާމަކުރެއެވެ.

އިމިގްރޭޝަނާއި ފުލުހުން ގުޅިގެން ރާއްޖޭގައި ގަވާއިދާއި ހިލާފަށް މަސައްކަތް ކުރާ އަދި ވިޔަފާރިކުރާ ބިދޭސީން ހޯދުމަށް އޮޕަރޭޝަންތަކެއް ހިންގަމުންނެވެ. މި އޮޕަރޭޝަންތަކުގައި 127 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ.

ގަވާއިދާ ހިލާފަށް މަސައްކަތް އަދި ވިޔަފާރި ކުރާ ބިދޭސީން ފަސޭހައިން ރިޕޯޓުކުރުމަށް އިމިގްރޭޝަން ވޮޗް ގެ ނަމުގައި ހާއްސަ ޕްލެޓްފޯމެއް އުފައްދާފައިވެއެވެ. މި ޕްލެޓް ފޯމު މެދުވެރިކޮށް ލިބޭ މައުލޫމާތުތަކާއި ގުޅިގެން ވެސް އިމިގްރޭޝަނާއި ފުލުހުން އޮޕަރޭޝަން ކުރިއަށް ގެންގޮސްފައިވެއެވެ.