ބަނގުރާ ގުދަނެއް ގެންގުޅުނު މީހަކަށް 12،000ރ ގެ ޖޫރިމަނާއެއް!

ފުޅާ ދާއިރާއެއްގައި ބަނގުރާގެ ވިޔަފާރި ކުރިމީހަކު 12،200ރ އިން ޖޫރިމަނާ ކުރަން ކްރިމިނަލް ކޯޓުން ހުކުމްކޮށްފިއެވެ.

މި ހުކުމްކުރީ 2019 ވަނަ އަހަރުގެ ޑިސެމްބަރުމަހުގެ ތެރޭގައި މޯލްޑިވްސް ޕޮލިސް ސަރވިސްއިން ހިންގި އޮޕަރޭޝަނެއްގައި ބަނގުރަލުގެ އެކި ބާވަތްތައް ފޮރުވާފައިހުރި ގުދަނެއް ބަލާ ފާސްކޮށް ގިނަ އަދަދެއްގެ ބަނގުރަލާއެކު މީހަކު ހައްޔަރުކުރި މައްސަލައެއްގައެވެ.

މޯލްޑިވްސް ޕޮލިސް ސަރވިސްގެ އިންޓެލިޖެންސަށް ލިބުނު މަޢުލޫމާތަކާގުޅިގެން އޭނާ ހައްޔަރުކޮށް އޭނާ ދިރިއުޅޭ ގޭގެ 4 ވަނަ ފަންގިފިލާގައި ހުންނަ ގުދަނެއްގެ ތެރެއިން 40 އަށް ވުރެ ގިނަ ބަނގުރާ ފުޅި ފެނިފައިވާކަމުގެ ހެއްކާއި ގަރީނާ ފުލުހުން ކޯޓަށް ހުށަހަޅާފައިވާއިރު، އޭނާ ވަނީ ބަނގުރާ ގެންގުޅެ ވިޔަފާރިކުރިކަމަށް ކުރާ ދަޢުވާއަށް އިންކާރުކުރާކަމަށް ކޯޓުގައި ބުނެފައެވެ.

ޕްރޮސެކިއުޓަރ ޖެނެރަލްގެ އޮފީހުން އޭނާގެ މައްޗަށް ކުރި ދަޢުވާއަކީ ހުއްދަ ނަގައިގެން ކުރަންޖެހޭކަމެއް ހުއްދަ ނުނަގާ ކުރުމުގެ ދަޢުވާއެވެ.

ބަނގުރަލާއި އޫރުމަހުގެ ޤަވާއިދުގެ 10 ވަނަ މާއްދާގައި ބުނާގޮތުން ރާއްޖޭގެ މީހުން ދިރިއުޅޭ ރަށްރަށުގައި ބަނގުރާ ގެންގުޅެވޭނީ، ރާއްޖޭގައި ހުންނަ ބޭރު ޤައުމުތަކުގެ ޑިޕްލޮމެޓިކް މިޝަންތަކުގައި ތިބޭ ބިދޭސީ މުވައްޒަފުންގެ ތެރެއިން އެމިޝަންއަކުން ކަނޑއަޅާ ބަޔަކަށް، އިކޮނޮމިކް މިނިސްޓްރީން ދޭ ޚާއްސަ ހުއްދައެއްގެ ދަށުންނެވެ.

މިމައްސަލާގައި ޕްރޮސެކިއުޓަރ ޖެނެރަލްގެ އޮފީހުން ހުށަހެޅި ހެއްކާއި ދައުވާލިބުނު މީހާގެ ފަރާތުން ހުށަހެޅީ ދިފާޢީ ހެކިތަކަށް ރިޢާޔަތްކުރުމަށްފަހު، މައްސަލަ ސާބިތުވާކަމަށް ނިންމައި، ކުށުގެ އަދަބަށްވާ 2 މަހާއި 1 ދުވަހުގެ ޖަލުހުކުމް 12،200ރ ގެ ޖޫރިމަނާއަކަށް ބަދަލުކުރުމަށް ކްރިމިނަލް ކޯޓުން ވަނީ ނިންމާފައެވެ. ކްރިމިނަލް ކޯޓުގެ ހުކުމުން އެނގޭ ގޮތުގައި ޖޫރިމަނާއަކަށް ބަދަލުކޮށްފައިވަނީ ދައުވާލިބޭ މީހާ އެގޮތަށް އެދުމުންނެވެ.